ახალქალაქში, ქართული ოცნების დეპუტატის, ენზელ მკოიანის სახლთან ცეცხლსასროლი იარაღიდან სროლის საქმეზე გამოძიება დაიწყო. ვინმეს დაკავებისა და სხვა დეტალების შესახებ შსს ინფორმაციას არ ავრცელებს. შემთხვევა 26 მარტს მოხდა. როგორც ადგილობრივი გამოცემა, სამხრეთის კარიბჭე წერს, საქმეზე პოლიციაში უკვე გამოიკითხა თავად დეპუტატი მკოიანიც.

უცნობია სროლის მიზეზი და ისიც, თუ ვინ ვის ესროლა. შემთხვევის შედეგად არავინ დაშავებულა. კიდევ ერთი ადგილობრივი გამოცემა, JNEWS.GE, რომელმაც თავდაპირველად გაავრცელა ინფორმაცია ამ თემაზე, წერს, რომ იარაღიდან 4-5-ჯერ გაისროლეს.

ამავე გამოცემის ცნობით, შესაძლოა, სროლა დეპუტატ ენზელ მკოიანსა და ნაციონალური მოძრაობის ყოფილ დეპუტატ, სამველ პეტროსიანს შორის არსებულ დაპირისპირებას უკავშირდება. ადგილობრივები აცხადებენ, რომ დაპირისპირება იყო პეტროსიანისა და მკოიანის მომხრეებს შორის, რაც პოლიციელების ჩარევის შემდეგ განიმუხტა.

On.ge ცდილობდა დეპუტატ ენძელ მკოიანთან დაკავშირებასაც, თუმცა ის სატელეფონო ზარებს არ პასუხობს. შსს-ში ამბობენ, რომ ფაქტზე გამოძიება დაიწყო ჯგუფურად განხორციელებული ძალადობისა და იარაღის მართლსაწინააღმდეგო შეძენა-შენახვა-ტარების მუხლებით (126-ე მუხლის 1¹ ნაწილის "ბ" ქვეპუნქტით და 236-ე მუხლის მე-3 და მე-4 ნაწილებით.)