COVID-19-ის საფრთხეებთან ბრძოლაში აშშ-ს მხარდაჭერით საქართველოს მასშტაბით 200-ზე მეტი პროფესიონალი გადამზადდა. ტრენინგები ჩატარდა ვირუსის სწორ იდენტიფიცირებასა და მეთვალყურეობაში, ასევე, ინფექციის პრევენციასა და კონტროლის პრაქტიკებზე. ამის შესახებ აშშ-ს საელჩო საქართველოში განცხადებას ავრცელებს.

"აშშ-ის დაავადებათა კონტროლის ცენტრისა და საქართველოში მათი კოლეგების მრავალწლიანი თანამშრომლობა ეხმარება საქართველოს COVID-19-ის საფრთხეებთან ბრძოლაში. ჩვენ სიამაყით ვუჭერთ მხარს საქართველოს დაავადებათა კონტროლის ეროვნულ ცენტრსა და ჯანდაცვის სამინისტროს. მოუთმენლად ველით თანამშრომლობის გაგრძელებას ქართველი ხალხის ჯანმრთელობისა და უსაფრთხოების დასაცავად", — წერია საელჩოს განცხადებაში.

27 მარტის დილის მონაცემებით, საქართველოში კორონავირუსის 81 დადასტურებული შემთხვევაა. აქედან 13 გამოჯანმრთელდა. გაიზარდა კარანტინში მყოფი პირების რიცხვიც და ის უკვე 4 505-ია, ხოლო სტანციონარში 247 პაციენტი რჩება.