საგარეო საქმეთა მინისტრის, დავით ზალკალიანის განცხადებით, საქართველოში დასაბრუნებელი ავიარეისის ბილეთები უცხოეთში დარჩენილი მოქალაქეებისთვის ეტაპობრივად, რეისამდე რამდენიმე დღის ადრე იქნება ხელმისაწვდომი.

უახლოესს რეისებს აირზენა 26 და 31 მარტს ვენიდან და ამსტერდამიდან განახორციელებს. მინისტრის განმარტებით, ფრენებზე ბილეთები სრულად გაიყიდა. ზალკალიანი ამბობს, რომ მგზავრების დიდი ნაწილი თავშესაფრებითა და პირველადი საჭიროების პროდუქტებით უზრუნველყოფილი არიან.

რაც შეეხება შემდეგ ფრენებს, რომელიც ვარშავის, ათენისა და ლარნაკას მიმართულებით განხორციელდება, რეისის შესრულებამდე რამდენიმე დღით ადრე ბილეთები გაიყიდება თავისუფალი პრინციპით და ხელმისაწვდომი იქნება კომპანიის ვებგვერდზე.

"ყოველი მომდევნო რეისი და მასთან დაკავშირებული ბილეთების ინფორმაცია განთავსება წინასწარ როგორც საქართველოს საგარეო საქმეთა სამინისტროს, ისე საქართველოს დიპლომატიური წარმომადგენლობებისა და კომპანიის ვებგვერდზე", — აღნიშნა მინისტრმა.

მან კიდევ ერთხელ განმარტა, რომ ბილეთის ფასი არ უნდა აღემატებოდეს 199 ევროს და ეს პრინციპი უნდა იყოს მკაცრად დაცული. საქართველოში ჩამოსული ყველა მგზავრი კი 14-დღიან სავალდებულო კარანტინში მოხვდება.

შემდეგი ფრენების განრიგი:

3 აპრილი თბილისის-ვარშავა-თბილისი;

7 აპრილი თბილისი-ათენი-თბილისი;

10 აპრილი თბილისი-ლარნაკა-თბილისი.

დავით ზალკალიანის განცხადებითვე, ისინი მუშაობენ, რომ იტალიაში, ესპანეთში თუ სხვა ქვეყნებში დარჩენილი საქართველოს მოქალაქეები ქვეყანაში დააბრუნონ.