რესპუბლიკული პარტიის წევრი, დავით ზურაბიშვილი ამბობს, რომ მას შემდეგ, რაც აშშ-ს პრეზიდენტის არჩევნებში რესპუბლიკელმა დონალდ ტრამპმა გაიმარჯვა, საქართველოსთან მიმართებით მნიშვნელოვან ცვლილებებს არ უნდა ველოდოთ:

"ძალიან მნიშვნელოვანია, ვინ იქნება სახელმწიფო მდივანი და ვის ჩაბარდება საგარეო საქმეები ახალ მთავრობაში. პრინციპში ჩვენს რეგიონთან მიმართებაში, იგივე, რუსეთთან პოლიტიკის მიმართულებით, დაახლოებით იქნება ის, რაც დიდი ხნის განმავლობაში გრძელდება. ნებისმიერი დათბობა რუსეთის მიმართ ამერიკის მხრიდან, არასდროს გრძელდება დიდხანს".

თავის მხრივ, რუსეთის პრეზიდენტმა, ვლადიერ პუტინმა კი დღეს აღნიშნა, რომ ტრამპის გამარჯვების შემდეგ, რუსეთ-ამერიკის ურთიერთობის კრიზისული სიტუაციიდან გამოყვანა შესაძლებელი გახდება.

აშშ-ს რიგით 45-ე პრეზიდენტი რესპუბლიკელი დონალდ ტრამპი გახდა. პრეზიდენტის არჩევნებში მან დემოკრატების კანდიდატს, ჰილარი კლინტონს მოუგო.

თუმცა, ბოლო მონაცემებით, ჰილარი კლინტონს 59 079 077 ამერიკელი ამომრჩეველი უჭერს მხარს, ხოლო დონალდ ტრამპს 58 941 325, რაც ნიშნავს იმას, რომ კლინტონს ტრამპთან შედარებით 137 752 ხმით მეტი აქვს. მიუხედავად ამისა, არჩევნების საბოლოო შედეგი არ იცვლება, რადგან ტრამპმა ამომრჩეველთა კოლეგიის 276 ხმა უკვე მიიღო, როცა კლინტონს 218 ხმა აქვს. პრეზიდენტობისთვის საჭიროა სულ 270 ხმა.

ნახეთ როგორ ირჩევენ პრეზიდენტს ამერიკაში: საარჩევნო სისტემის დეტალები.