საკულტო სიტკომის მილიონობით მაყურებელი მოუთმენლად ელოდა შოუს დასრულებიდან 16 წლის შემდეგ მეგობრების დაბრუნებას ეკრანებზე, თუმცა კორონავირუსის ეპიდემიამ მის წარმოებაზეც იქონია გავლენა.

Variety-ის ცნობით, ამ სიტკომის ჯერჯერობით ბოლომდე დაუზუსტებელი შინაარსის მქონე პროექტის გადაღებები შემდეგ კვირაში უნდა დასრულებულიყო, თუმცა მასზე მუშაობა უსაფრთხოების ზომების გამო HBO Max-მა შეწყვიტა.

გავრცელებული ინფორმაციის თანახმად, გადაღებებს მაისის დასაწყისში განაახლებენ, თუ მსოფლიოში არსებული მდგომარეობა შესაბამისად დასტაბილურდება.

თითქმის ერთი თვის წინ ოფიციალურად დადასტურდა, რომ ამ ერთ-ერთი ყველაზე პოპულარული შოუს მსახიობები — ჯენიფერ ენისტონი, კორტნი კოქსი, ლიზა კუდროუ, მეთ ლებლანკი, მეთიუ პერი და დევიდ შვიმერი კვლავ ერთიანდებოდნენ.

ახალი პროექტი დიდი ალბათობით unscripted ფორმატის იქნება, რაც იმას გულისხმობს, რომ ის სცენარის გარეშე, მსახიობების იმპროვიზაციით შეიქმნება. ამის გათვალისწინებით, მომავალი შოუ, შესაძლოა, იყოს დოკუმენტური (მსახიობებმა გადაღებები გაიხსენონ) ან თავიანთი იმპროვიზაციით სცადონ ამ სიტკომისთვის დამახასიათებელი კომედიური სცენების გათამაშება.

რაც არ უნდა იყოს, სამწუხაროდ, მის სანახავად და შესაფასებლად, იმაზე დიდხანს მოგვიწევს დალოდება, ვიდრე დაგეგმილი იყო.

ასევე იხილეთ: