ტყიბულში მეშახტეები დამსაქმებელ კომპანიასთან სახელმწიფოს წარმომადგენლის თანდასწრებით შეხვედრას ითხოვენ. ამის შესახებ ისინი ტყიბულელი მეშახტეების საინიციატივო ჯგუფის ფეისბუქ გვერდზე გავრცელებულ ვიდეო მიმართვაში საუბრობენ.

მეშახტეების თქმით, 13 მარტის გაფიცვა, რომლის მთავარი მოთხოვნა თებერვლის შეთანხმების პირობების შესრულება იყო, დამსაქმებელმა და სახელმწიფომ უპასუხოდ დატოვეს.

"ამიტომ ჩვენ დღეს ვითხოვთ ღია შეხვედრის ორგანიზებას დამსაქმებელ კომპანიასთან, სახელმწიფოს წარმომადგენლის მონაწილეობით. ამ შეხვედრაზე ჩვენ ველით, რომ გაეცემა მკაფიო პასუხები ჩვენ მიერ დასმულ კითხვებზე და დაითქმება გონივრული ვადები ჩვენი მოთხოვნების დასაკმაყოფილებლად", — ამბობენ მეშახტეები გავრცელებულ ვიდეოში.

ისინი ასევე აღნიშნავენ, რომ ახსოვთ 2018 წლის პირობა სამუშაო გარემოს უსაფრთხოების უზრუნველყოფის შესახებ, რომელიც სახელმწიფომ არ შეასრულა.

"ჩვენ ეს პირობა მწარედ გვახსენდება ყოველ ჯერზე, როდესაც შახტში ჩავდივართ. სახელმწიფოს მიერ ამ პირობის შეუსრულებლობა კომპანიას საშუალებას აძლევს ისარგებლოს ჩვენი სოციალური მდგომარეობით და სიცოცხლისთვის საშიშ გარემოში მუშაობა გვაიძულოს. ეს შეუძლებელია დიდხანს გაგრძელდეს და თუ გაგრძელდება, შესაძლოა ტყიბულში ახალი ტრაგედიები დატრიალდეს. ამაზე პასუხისმგებელნი თანაბრად იქნებიან სახელმწიფო და კომპანია", — ამბობენ მეშახტეები.

ისინი მიმართავენ საქართველოს პრემიერ-მინისტრს, ჯანდაცვის მინისტრსა და ეკონომიკის მინისტრს, დაუყოვნებლივ შედგეს მეშახტეების ღია შეხვედრა კომპანიასთან, სახელმწიფოს მონაწილეობით.

თებერვალში მეშახტეები საფრთხის შემცველ სამუშაო გარემოს და სამუშაო პირობებს აპროტესტებდნენ. სამუშაო პროცესი მას შემდეგ აღდგა, რაც რეორგანიზაციის ბრძანებაში აისახა ის საკითხები, რომლებიც შრომით და სამართლებრივ უფლებებს არეგულირებდა. 13 მარტს ისინი სწორედ ამ მოთხოვნების შეუსრულებლობის გამო გაიფიცნენ.

გასულ წელს კი, მინდელისა და ძიძიგურის შახტებში, დახლოებით, 30 მეშახტე ჩავიდა და პროტესტის ნიშნად ადგილის დატოვებას არ აპირებდა. მათ გაფიცვა 26 სექტემბერს შეწყვიტეს. ეკონომიკის მინისტრი ამ დღეს ტყიბულში ჩავიდა და მოლაპარაკებების შემდეგ განაცხადა, რომ გამოჩნდა ახალი ინვესტორი კომპანია, რომელმაც იკისრა ვალდებულება, გაისტუმროს სოციალური გადასახადები, მათ შორის, დაზარალებული ოჯახების წინაშე.

ტყიბულში მეშახტეებს იგივე პრობლემებს 2018 წელსაც ჰქონდათ. მაშინ დასაქმებულები პრემიერ-მინისტრ მამუკა ბახტაძესთან შეხვედრას მოითხოვდნენ, რათა მათთვის წარედგინათ ოფიციალური დოკუმენტი, რომ ისინი შახტებში გამოძიების დასრულებამდე, ხელფასებს მიიღებდნენ. ტყიბულში 2018 წლის 16 ივლისს მინდელის შახტაში მომხდარ აფეთქებას 4 ადამიანის სიცოცხლე ემსხვერპლა. ამის გამო, საქართველოს შინაგან საქმეთა სამინისტრომ ტყიბულში არსებული 25-ვე შახტი დალუქა. მაშინდელმა პრემიერმა, მამუკა ბახტაძემ კი განაცხადა, რომ მინდელის შახტის დახურვის განმავლობაში მეშახტეებს ხელფასები აუნაზღაურდებოდათ.