საერთაშორისო გამჭვირვალობა — საქართველო (TI) 2025 წლის 9 თვის მდგომარეობით მედიაგარემოს შეფასებას აქვეყნებს. ორგანიზაციის განცხადებაში აღნიშნულია, რომ დამოუკიდებელი, კრიტიკული მედიისა და ჟურნალისტების მიმართ სხვადასხვა ტიპის ძალადობის, დაშინების, მუქარის, შევიწროების, დევნისა და ჟურნალისტურ საქმიანობაში სხვადასხვა ტიპის ხელშეშლის მანკიერი პრაქტიკა გრძელდება. 2025 წლის 9 თვის (იანვარი-სექტემბერი) მონაცემებით, TI-მ უკვე 180-ზე მეტი საჯაროდ დაფიქსირებული ასეთი შემთხვევა აღრიცხა, მათგან ნახევარზე მეტი — ბოლო 5 თვეში. განცხადებაში ყურადღება გამახვილებულია ბათუმელებისა და ნეტგაზეთის დამფუძნებლის, მზია ამაღლობელისთვის 2-წლიანი პატიმრობის შეფარდებაზე.

TI აღნიშნავს, რომ 2025 წელი რთული იყო რეგიონული მედიებისთვისაც — რამდენიმე მათგანი დაიხურა.

"2025 წელი დრამატულად რთული იყო რეგიონული მედიისთვისაც. "რეგიონულ მაუწყებელთა ალიანსის" ინფორმაციით, ფინანსური სირთულეების გამო, მიმდინარე წელს, 21 რეგიონული მაუწყებლიდან ყოველდღიურ ახალ ამბებს ვეღარ აწარმოებს 17. მათ შორის, წლის დასაწყისში, მრავალწლიანი ოპერირების შემდეგ, მაუწყებლობა სრულად შეაჩერეს ტელეკომპანიებმა — "ბორჯომმა" და "TV 25-მა" (აჭარა), ასევე ახალციხის ტელევიზია "მეცხრე არხი ახალციხემ". ამასთან, მფლობელებს შორის უთანხმოების შედეგად, 2025 წლის თებერვალში ჯერ მაუწყებლობა დროებით შეაჩერა, მაისში კი სრულად დაიხურა ქვეყნის ერთ-ერთი წამყვანი კრიტიკული ტელევიზია "მთავარი არხი", — წერია განცხადებაში.

TI-მ მედიის წინააღმდეგ სხვადასხვა ტიპის ძალადობისა და ხელშეშლის შემთხვევები 5 კატეგორიად დაყო.

ესენია:

1.მედიის წარმომადგენლებზე ფიზიკური თავდასხმა და ძალადობა;

2.ჟურნალისტების ადმინისტრაციული წესით დაჯარიმება;

3.მმართველი გუნდისა და პროსამთავრობო მედიის თავდასხმა კრიტიკულ მედიაზე;

4.კრიტიკულად განწყობილი თანამშრომლების დევნა საზოგადოებრივ მაუწყებელში;

5.უცხოელი ჟურნალისტებისთვის ქვეყანაში შემოსვლის აკრძალვა.

TI წერს, რომ მედიის წარმომადგენლებისა და ჟურნალისტების დევნის მავნე პრაქტიკა ქართული ოცნების რეპრესიული პოლიტიკის გაგრძელებაა. მათივე თქმით,"ამ გარდამტეხ მომენტში, ქართული კრიტიკული მედია მყარად იბრძვის ძალადობრივი სისტემის წინააღმდეგ,მწირი რესურსების პირობებშიც კი, კვლავ აგრძელებს საზოგადოების ინფორმირებას და პროსამთავრობო ტელევიზიების პროპაგანდისტული საინფორმაციო ველის დაბალანსებას."

"მთლიანობაში, მედიის წარმომადგენლებისა და ჟურნალისტების დევნის მავნე პრაქტიკა ქართული ოცნების იმ რეპრესიული პოლიტიკის გაგრძელებაა, რომლის მიზანიც ქვეყანაში თავისუფალი სივრცის მოსუფთავება და გაქრობაა. თუმცა, უამრავი სირთულის, გამოწვევისა და არაერთი შემზღუდავი კანონის მიღების მიუხედავად, რომელთა მიზანიც დამოუკიდებელი მედიის საბოლოო გაჩუმებაა, ქვეყნისთვის ამ გარდამტეხ მომენტში, ქართული კრიტიკული მედია მყარად იბრძვის ძალადობრივი სისტემის წინააღმდეგ,მწირი რესურსების პირობებშიც კი, კვლავ აგრძელებს საზოგადოების ინფორმირებას და პროსამთავრობო ტელევიზიების პროპაგანდისტული საინფორმაციო ველის დაბალანსებას", — აღნიშნულია TI-ს განცხადებაში.