ეკვადორში მომიტინგეები თავს დაესხნენ მანქანების კოლონას, რომელთაგან ერთ-ერთში პრეზიდენტი დანიელ ნობოა იმყოფებოდა. ინციდენტი სამშაბათს, 7 ოქტომბერს, ქვეყნის ცენტრალურ ნაწილში, კანიარის პროვინციაში მოხდა, — ნათქვამია ეკვადორის პრეზიდენტის ადმინისტრაციის სოციალურ მედია პლატფორმა X-ზე გამოქვეყნებულ პოსტში.

ეკვადორის გარემოს დაცვის მინისტრის, ინეს მანსანოს თქმით, ნობოა კანარში წყლის გამწმენდი ნაგებობის გახსნის ღონისძიებაზე მიემართებოდა, როდესაც მისი კოლონა ასობით მომიტინგემ ალყაში მოაქცია. დაახლოებით 500 ადამიანი მივარდა და ქვები ესროლა, პრეზიდენტის მანქანას ნატყვიარებიც ეტყობა.

ეკვადორულმა AP-მ გამოაქვეყნა თავდასხმის მსხვერპლი მანქანების ფოტოები, ასევე ინციდენტის დროს ერთ-ერთი მანქანიდან გადაღებული ვიდეო.

მედიის ცნობით, კოლონაზე თავდასხმასთან დაკავშირებით სულ მცირე ხუთი ადამიანი დააკავეს. პრეზიდენტის ადმინისტრაციამ პირობა დადო, რომ "ტერორიზმისა და მკვლელობის მცდელობისთვის" დევნას დაიწყებდა.

CNN-ის ცნობით, სექტემბრის ბოლოს ნობოას ავტოკოლონასაც ესროლეს ქვები. პრეზიდენტთან ერთად მანქანაში უცხოელი დიპლომატები იმყოფებოდნენ, მათ შორის ვატიკანის წარმომადგენელი და ევროკავშირის ელჩი. პოლიტიკოსები არ დაშავებულან.

ნობოას წინააღმდეგ საპროტესტო აქციები ეკვადორში სექტემბრის შუა რიცხვებიდან მიმდინარეობს. ამის მიზეზი ქვეყანაში დიზელის საწვავის სუბსიდიების გაუქმება და საწვავზე ფასების ზრდა გახდა. ხელისუფლებამ ეს გადაწყვეტილება სახელმწიფო ხარჯების შემცირების, საწვავის კონტრაბანდასთან ბრძოლის და სოციალური პროგრამებისთვის თანხების გამოთავისუფლების სურვილით ახსნა.

მას შემდეგ, ეკვადორის მთავრობის წინააღმდეგ საპროტესტო აქციები არაერთხელ გადაიზარდა პოლიციასთან დაპირისპირებაში, რასაც ერთი მშვიდობიანი მოქალაქის სიცოცხლე ემსხვერპლა. მთავრობა არეულობის ორგანიზებაში ნარკოკარტელებს ადანაშაულებს და მთავრობის წარმომადგენლებზე თავდასხმებს ტერორისტულ აქტებს უწოდებს.