თურქეთის ხელისუფლებამ ნარკოტიკების სავარაუდო გამოყენების საქმეზე გამოძიება დაიწყო, რომელიც 19 ცნობილ საჯარო პირს ეხება — მათ შორის არიან მომღერლები ჰადისე აჩიქგიოზი და ირემ დერიჯი, მსახიობები დემეტ ევგარი და ბერაქ თუზუნათაჩი, ასევე "ინფლუენსერები" დიუგუ ოზასლანი და დერინ ტალუ. ამის შესახებ ინფორმაციას თურქული მედია ავრცელებს.

სტამბოლის მთავარი პროკურატურის ინფორმაციით, გამოძიება შეეხება დანაშაულს, რომელიც დაკავშირებულია "ნარკოტიკული ან მასტიმულირებელი ნივთიერებების გამოყენებასთან", თურქეთის სისხლის სამართლის კოდექსის შესაბამისად. ოფიციალურმა პირებმა განმარტეს, რომ გამოძიება არ გულისხმობს დაკავების ბრძანებებს — გამოძახებული პირები უნდა მივიდნენ ჩვენების მისაცემად და ჩააბარონ სისხლის ანალიზი.

სტამბოლის ჟანდარმერიის სარდლობამ ოპერაციის ფარგლებში მრავალი ცნობილი მსახიობი, მომღერალი და საჯარო პირი გადაიყვანა სამედიცინო ცენტრებში სისხლის ნიმუშების ასაღებად, რის შემდეგაც ისინი ჩვენების მისაცემად წაიყვანეს.

პროკურატურის მიერ გამოქვეყნებულ სიაში მოხვდნენ ცნობილი მომღერლები, მსახიობები, ტელეწამყვანები და სოციალური ქსელებში პოპულარული პირები. მათ შორის არიან ზინეით სალი, ქუბილაი აქა, კაან იილდირიმი, მერტ იაზიჯიოღლუ, მეტინ აკდულგერი, ჯერენ მორაი,ოზგე ოზპირინჩი, ენგინ პოლათი, დილან პოლათი, დერენ ტალუ, ზეინეფ მერიჩ არალი, ბირჯე აკალაი და იურისტი ფეიზა ალტუნი.

თურქეთში ნარკოტიკული ნივთიერებების გამოყენების გამოძიება სისხლის სამართლის კოდექსის 191-ე მუხლით რეგულირდება. აღნიშნული კანონის თანახმად, პირადი მოხმარების შემთხვევებში ხელისუფლებას უფლება აქვს დანიშნოს მკურნალობა, რეაბილიტაცია ან პრობაცია ციხეში სასჯელის მოხდის ნაცვლად.

გამოძიების საბოლოო შედეგი დამოკიდებული იქნება ტოქსიკოლოგიური ტესტების პასუხებსა და შემდგომ სამართლებრივ შეფასებებზე.