"ოცნების ხელისუფლების პარლამენტის თავმჯდომარემ, შალვა პაპუაშვილმა "პირველი არხის" ეთერში განაცხადა, რომ 4 ოქტომბერს "შედგა სახელმწიფოს ღალატის კოლექტიური აქტი რამდენიმე ათასი ადამიანისგან".

"ახლა თავი რომ უნდათ მოისულელონ ზოგიერთმა მოფარფატე აქტივისტმა, თითქოს არაფერი იცოდნენ, ყველამ ყველაფერი იცოდა, რომ ოთხში ოთხ საათზე მიდიოდნენ ხელისუფლების დასამხობად. გულისხმობ იმ რამდენიმე ათას ადამიანს, ვინც თავისუფლების მოედანზე იდგა, იმ ჩვენს თანამოქალაქეებს. არა სცენაზე მყოფ ლიდერებს და არა პოლიტიკოსებს, მათ შორის, არა „ენჯეოს“ ხელმძღვანელებს, არამედ მოქალაქეებს, რომლებიც იქ მივიდნენ ოთხში, 16:00 საათზე. ისინი იქ მივიდნენ ხელისუფლების დასამხობად და იქ შედგა სახელმწიფოს ღალატის კოლექტიური აქტი ამ რამდენიმე ათასი ადამიანისგან", — განაცხადა შალვა პაპუაშვილმა "პირველი არხის" ეთერში.

მისი თქმით ამ ადამიანებს "აშკარად აქვთ ემოციური პრობლემები და ამ თავის ემოციურ დაზიანებას აფრქვევენ საზოგადოებაზე".

"ეს ის ხალხია, ნენსი ვოლანდები, ნანა ნანუ სანდერები და "პოკემონის" ფორმაში გამოწყობილი ზრდასრული ადამიანი რომ არის, ადამიანები, რომლებიც საკუთარ ცხოვრებაზე, საკუთარ ქვეყანაზე გაბოროტებული არიან. ხომ ვხედავთ, რა სახეებია, ემოციურად დაზიანებული ადამიანები, რომლებიც პერიოდულად გამოდიან ქვეყნის სამტროდ. თქვას თითოეულმა მათგანმა, იდგნენ, თუ არა 2022-ში რუსთაველზე და ითხოვდნენ თუ არა მეომრების გაგზავნას. ეს ის ხალხია, ერთი და იგივე ჯგუფი, რამდენიმე ათასი ადამიანი, რომელიც ასეთ პერიოდულად, რაღაც გამწვავებებით გამოდის, ხან "პოკემონის", ხან "სპანჩბობის" ფორმაში, რომელიც ახლა ვნახეთ, კვამლში რომ დარბოდა. ეს არიან ადამიანები, რომლებსაც აშკარად აქვთ ემოციური პრობლემები და ამ თავის ემოციურ დაზიანებას აფრქვევენ საზოგადოებაზე. დღესაც ვნახეთ რუსთაველის გამზირზე, რომ ხან ავტობუსს მივარდნენ, ხან მანქანას, ხან რომელ მოქალაქეს და ხან რას. ასე, რამდენიმე რამდენიმე ასეულ ადამიანს, რომელიც რუსთაველზე არის და რამდენიმე ათასს, რომელიც შეიძლება, შეკრიბონ ხოლმე ასეთ ღონისძიებებზე, უნდა უყუროს ოთხმა მილიონმა ადამიანმა", — განაცხადა პაპუაშვილმა.