ოცნების პრემიერმინისტრმა, ირაკლი კობახიძემ აშშ-ს სახელმწიფო დეპარტამენტს ბრიფინგზე მოუწოდა, რომ "დაგმოს მკაფიოდ ხელისუფლების დამხობის მცდელობა და დაამტკიცოს, რომ ასეთი ინტერესები არ აქვს ჩვენი ქვეყნის მიმართ".

კობახიძის თქმით, აშშ-ს სახდეპმა უნდა დაამტკიცოს, რომ მოქმედებს არა "დიფ სთეითის" გავლენით, არამედ ამერიკელი ხალხის ობიექტური ინტერესების შესაბამისად

"ჩემი მოწოდებაა სახელმწიფო დეპარტამენტის მიმართ, დაგმოს მკაფიოდ ხელისუფლების დამხობის მცდელობა და ამით ქმედითად დაამტკიცოს ქართველი ხალხის წინაშე, რომ ასეთი ინტერესები არ აქვს ჩვენი ქვეყნის მიმართ.

სახელმწიფო დეპარტამენტმა კეთილი უნდა ინებოს და დაამტკიცოს, რომ მოქმედებს არა "დიფ სთეითის" გავლენით, არამედ ამერიკელი ხალხის ობიექტური ინტერესების შესაბამისად და ამის ყველაზე მარტივი მტკიცებულება იქნებოდა ხელისუფლების დამხობის მცდელობის დაგმობა", — განაცხადა "ოცნების" პრემიერმა, ირაკლი კობახიძემ ბრიფინგზე.

მანამდე ირაკლი კობახიძემ ბრიფინგზე თქვა, რომ "უკვე მეოთხე დღეა, რაც განხორციელდა ძალადობრივი შტურმი საქართველოს პრეზიდენტის სასახლეზე, რომლის წინასწარ გაცხადებული მიზანი ქართველი ხალხის მიერ არჩეული ხელისუფლების დამხობა იყო. თუმცა, ამ დღეების განმავლობაში, არცერთ ორგანიზაციას თუ სახელმწიფოს, რომელსაც საქართველოში განვითარებული შიდაპოლიტიკური მოვლენების მყისიერ შეფასებაზე, ქვეყნის გაკრიტიკებასა და მისთვის მითითებების მიცემაზე აქვს პრეტენზია — მათ შორის აშშ-ს, ევროკავშირს და ევროკავშირის კონკრეტულ ქვეყნებს — არ გაუკეთებია განცხადება, რომლითაც დაგმობდა და გაემიჯნებოდა ხალხის მიერ არჩეული ხელისუფლების დამხობის მცდელობას და ძალადობრივ შტურმს საქართველოს პრეზიდენტის სასახლეზე".

.