საქართველოს იუსტიციის უმაღლესი საბჭოს ინფორმაციით, დღეს, 11 მარტს ზუგდიდის რაიონულ სასამართლოში მყოფმა ორმა ადვოკატმა განაცხადა, რომ კორონავირუსის გავრცელების პრევენციის მიზნით თვითიზოლაციაში იმყოფებოდნენ. მათივე ინფორმაციით, ადვოკატებმა ამის საფუძველზე სხდომის გადადება ითხოვეს.

"მას შემდეგ, რაც სასამართლოს თანამშრომლებმა ადვოკატების თვითიზოლაციაში ყოფნის შესახებ შეიტყვეს მყისიერად იმოქმედეს და სთხოვეს შენობის დატოვება. მიუხედავად ამისა, ერთ-ერთი ადვოკატი სხდომათა დარბაზში შევიდა და თავად წარადგინა შუამდგომლობა პროცესის გადადების თაობაზე", — ნათქვამიას იუსტიციის საბჭოს განცხადებაში.

მათივე ინფორმაციით, სასამართლოს შენობაში ჩატარდა სადეზინფექციო სამუშაო და მხოლოდ ორი პროცესი გადაიდო თვითიზოლაციაში მყოფი ადვოკატების შუამდგომლობის საფუძველზე.