თურქეთის პრეზიდენტი რეჯეპ ტაიპ ერდოღანი არ იღებს ევროპის კრიტიკას თურქეთის სახალხო დემოკრატიული პარტიის კანონმდებელთა და ჟურნალისტთა დაკავების გამო და აცხადებს, რომ "ამიერიდან თურქეთი არ დაემორჩილება მითითებებს". ამის შესახებ ინფორმაციას პრო–სახელისუფლებო გამოცემა Hurriyet daily news ავრცელებს.

გამოცემის ინფორმაციით, 6 ნოემბერს, სტამბოლში საპატიო დოქტორის წოდების მიღებისას, მან ევროპა ზეწოლის გამო გააკრიტიკა:

"არ მაღელვებს ისინი დიქტატორს მიწოდებენ თუ რაიმე სხვას, ერთ ყურში შევუშვებ და მეორედან გამოვუშვებ. მნიშვნელოვანია, რას დამიძახებს მე ჩემი ხალხი. დასავლეთს იმედი არ უნდა ჰქონდეს, რომ ისინი თურქეთს აიძულებენ, იცხოვროს მათი წესებით. ისეთი მეთოდების გამოყენების შედეგად, როგორიცაა გაზეთებისა და კარიკატურისტების მიერ ჩემთვის დიქტატორის წოდება და ა.შ. ელიან, რომ თურქეთი უკან დაიხევს. მათ ამის მოლოდინი არ უნდა ჰქონდეთ. ჩვენ ძალიან კარგად გვესმის მათი ეს ტაქტიკა".

ერდოღანის თქმით, თურქეთმა განვითარების ხედვა და ტაქტიკა იმ ინციდენტების შემდეგ შეცვალა, რაც ბოლო სამი წლის განმავლობაში ქვეყანაში მოხდა და ახლა მისი მთავარი კრიტერიუმია, "ყველაფერი გაკეთდეს ქვეყნისა და ერის მომავლისთვის".

ერდოღანის აღშფოთება გამოიწვია ევროპელ ლიდერთა კრიტიკამ თურქეთის ხელისუფლების მიერ ოპოზიციური პარტიის 9 ლიდერისა და კრიტიკულად განწყობილი გაზეთის 9 ჟურნალისტის ტერორიზმის ბრალდებით დაკავების გამო.

ერდოღანის თქმით, თურქეთი ებრძვის ტერორიზმს და ევროპა მას ამ ბრძოლაში სათანადოდ არ ეხმარება:

"როდის სურდა ევროპას თურქეთისთვის კარგი? არასდროს. რას უნდა ელოდოს თურქეთი დასავლეთისგან მაშინ, როცა 53 წელი ელოდებოდა ევროკავშირის კარის გაღებას? მოდი, ნუ გავისულელებთ თავს. ჩვენ საკითხები დამოუკიდებლად უნდა მოვაგვაროთ".

ერდოღანმა ევროპა ასევე დაადანაშაულა ტერორიზმის, კერძოდ კი ქურთების მშრომელთა პარტიის მხარდაჭერაში.