კორონავირუსის გავრცელებასთან დაკავშირებით საფრანგეთის ჯანდაცვის მინისტრმა ქვეყანაში აუცილებლად გასატარებელი შეზღუდვების შესახებ ისაუბრა, მათ შორის კი 31 მაისის ჩათვლით ქვეყნის მასშტაბით 5 ათას ადამიანზე მეტი მონაწილისგან შემდგარი ღონისძიებების ჩატარება აიკრძალა.

ეს შეზღუდვა საფრთხეს უქმნის კანის ყოველწლიურ ფესტივალს, რომელსაც კონომოყვარულები მთელი მსოფლიოდან მოუთმენლად ელიან: ფესტივალი 12-23 მაისს უნდა გამართულიყო, რომელშიც 12 ათასზე მეტი ადამიანი იღებს მონაწილეობას.

კანის კინოფესტივალის ადმინისტრაციას ამასთან დაკავშირებით ჯერ ოფიციალური განცხადება არ გაუვრცელებია, მაგრამ საფრანგეთის სახელმწიფო უწყების მიერ მიღებულ რეგულაციებს თუ გავითვალისწინებთ, წელს ფესტივალი, დიდი ალბათობით, დაგეგმილზე უფრო გვიან ჩატარდება.

აღსანიშნავია, რომ წლევანდელ ფესტივალის ჟიურის თავჯდომარედ ამერიკელი რეჟისორი, სპაიკ ლი აირჩიეს, რომელიც პირველი შავკანიანი ხელოვანი იქნება, ვინც ამ ფესტივალს უხელმძღვანელებს.