სულ ცოტა ხნის წინ ცნობილი გახდა, რომ გავლენიანი ამერიკელი რეჟისორი, სპაიკ ლი კანის კინოფესტივალის წლევანდელი დაჯილდოების ჟიურის თავმჯდომარე იქნება და ამით ისტორიაში პირველი შავკანიანი ხელოვანი გახდება, რომელიც 73-წლიანი ისტორიის მქონე ფესტივალის ჟიურის უხელმძღვანელებს.

ფესტივალის წესდების თანახმად, ჟიურის შემადგენლობა ყოველწლიურად იცლება — 2019 წელს მას მექსიკელი რეჟისორი, ალეხანდრო გონსალეს ინიარიტუ ხელმძღვანელობდა.

62 წლის ამერიკელ კინოხელოვანს კანის ფესტივალთან დიდხნიანი ისტორია აკავშირებს: მისი ისეთი ფილმები, როგორებიცაა She’s Gotta Have It და Do the Right Thing ჯერ კიდევ 80-იან წლებში აჩვენეს ფესტივალის ფარგლებში.

სპაიკ ლის ჯერჯერობით უკანასკნელი ფილმი BlacKkKlansman ასევე 2018 წელს კანის კინოფესტივალის მთავარ კონკურსში მონაწილეობდა და იმ წლის ჟიურიმ, რომელსაც ქეით ბლანშეტი ხელმძღვანელობდა, ფილმს გრან-პრი გადასცა.

სპაიკ ლი მსახიობ ჯონ დევიდ ვაშინგტონთან ერთად კანის 2018 წლის ფესტივალზე.

ფოტო: JACOVIDES-BORDE-MOREAU

"როცა დამირეკეს და შემომთავაზეს, რომ კანის 2020 წლის დაჯილდოების ჟიურის თავმჯდომარე ვყოფილიყავი, ერთდროულად გავოგნდი, გამიხარდა, გავოცდი და სიამაყით ავივსე", — განაცხადა სპაიკ ლიმ.

რეჟისორის განცხადებით, მისთვის ამ ფესტივალს განსაკუთრებულ მნიშვნელობა აქვს: "კანის ფესტივალმა ჩემსა და ჩემს კარიერაზე დიდი გავლენა იქონია. მარტივად შეგიძლიათ თქვათ, რომ კანის ფესტივალმა განსაზღვრა ჩემი ადგილი კინოში".

კანის ფესტივალზე წელს სპაიკ ლის კინოში შეტანილი განსაკუთრებული წვლილისთვის საპატიო ჯილდოსაც გადასცემენ.

ჟიურის დანარჩენი წევრების ვინაობა გაზაფხულის დასაწყისში გახდება ცნობილი, თავად ფესტივალი კი 13-23 მაისს გაიმართება.