საგარეო საქმეთა მინისტრის, დავით ზალკალიანის თქმით, საქართველოში ვიზიტით მყოფ სომხეთის პრემიერ-მინისტრთან, ნიკოლ პაშინიანთან კორონავირუსთან დაკავშირებით ერთობლივ ქმედებებს განიხილავენ. მისი თქმით, ქართულ და სომხურ მხარეებს შორის კორონავირუსთან დაკავშირებით კოორდინაცია გასული დღეების განმავლობაშიც "ეფექტურად" მიმდინარეობდა.

"აღსანიშნავია, რომ ვიზიტი მიმდინარეობს მსოფლიოში მძვინვარე კორონავირუსის ფონზე და მეზობელ ქვეყნებს შორის ძალიან მნიშვნელოვანია კოორდინაცია იმისთვის, რომ ამ გამოწვევას ჩვენ ერთობლივად გავუმკლავდეთ. ამ ვიზიტის დროსაც ჩვენ ვისაუბრებთ ასევე ერთობლივი ქმედებების ყველა იმ ძირითად მიმართულებაზე, რომელიც დაგვეხმარება ამ პრობლემასთან გამკლავებაში", — განაცხადა ზალკალიანმა.

დღეს, 3 მარტს, თბილისს სომხეთის პრემიერ-მინისტრი, ნიკოლ პაშინიანი ესტუმრა. ვიზიტის ფარგლებში პაშინიანი შეხვედრებს გამართავს პრემიერ-მინისტრ გიორგი გახარიასთან, პრეზიდენტ სალომე ზურაბიშვილთან, პარლამენტის თავმჯდომარე არჩილ თალაკვაძესთან და ასევე, გვირგვინით შეამკობს გმირთა მემორიალს.