სულ ცოტა ხნის წინ ცნობილი გახდა, რომ ნეტფლიქსთან ჰოლივუდის კიდევ ერთი კაშკაშა ვარსკვლავი, სანდრა ო ითანამშრომლებს. შემქმნელები

The Chair — ასე ჰქვია 6-ეპიზოდიან მინისერიალს, რომლის სიუჟეტიც ძირითადად ერთ-ერთ ცნობილ უნივერსიტეტში განვითარებულ მოვლენებზე მოგვითხრობს. შოუში მთავარ როლს სწორედ სანდრა ო შეასრულებს, რომელიც ინგლისური დეპარტამენტის ხელმძღვანელის როლს მოირგებს.

აღსანიშნავია, რომ მომავალი შოუს შექმნაში Game of Thrones-ის სცენარისტები, დევიდ ბენიოფი და დი ბი უაისი მიიღებენ მონაწილეობას. სერიალის მთავარი პროდიუსერი ამანდა პიტი იქნება, რომელსაც მანამდე ძირითადად სამსახიობო კარიერით ვიცნობდით: მას ისეთ ბლოკბასტერში მიუღია მონაწილეობა, როგორიცაა 2009 წელს გამოსული ფილმი 2012.

48 წლის მსახიობს, სანდრა ოს სატელევიზიო შოუების მოყვარულები საკულტო სერიალიდან Grey’s Anatomy-დან იცნობენ. ბოლო წლებში მან კიდევ ერთი დასამახსოვრებელი პერსონაჟი შექმნა: 2018 წელს გამოსულ არაერთი ემის მფლობელ სერიალში Killing Eve ევა პოლასტრის როლით მან ოქროს გლობუსიც დაიმსახურა. სულ მალე ამ შოუს მესამე სეზონის პრემიერაც შედგება.

სანდრა ო სერიალში Killing Eve

ფოტო: BBC America

სანდრა ოსთან ერთად მომავალ პროექტში ვიხილავთ ჯეი დუპლასს, რომელიც მანამდე სერიალ Transparent-ში თამაშობდა.

ჯერჯერობით უცნობია, თუ როდის შედგება The Chair-ის პრემიერა ნეტფლიქსის პლატფორმაზე, თუმცა, თუ გავითვალისწინებთ, სანდრა ოს აქამდე განხორციელებულ პროექტებს, დარწმუნებით შეგვიძლია ვთქვათ, რომ წინ კიდევ ერთი საინტერესო სანახაობა გველოდება.