BBC America-ს თრილერის ჟანრის გახმაურებული სერიალი, Killing Eve მილიონობით მაყურებელმა მალევე შეიყვარა და გასულ წელს გამოსული მეორე სეზონის შემდეგ რამდენიმე თვეში ახალი სეზონის პრემიერაც შედგება.

სანდრა ოსა და ჯოდი კომერის პერსონაჟების ურთიერთსაწინააღმდეგო გრძნობებით სავსე ისტორია ისეთ მოულოდნელ ნოტაზე დასრულდა მეორე სეზონში, რომ ერთგული მაყურებლები მოუთმენლად ელიან მის გაგრძელებას.

შოუს შემქმნელებმა მესამე სეზონი ოფიციალურად ვალინტინობის დღეს, 14 თებერვალს დააანონსეს და პრემიერის თარიღიც გაგვიმხილეს — 26 აპრილი.

მართალია, სიყვარულის დღე ვის შეეფერება იმაზე უკეთ, ვიდრე ევა პოლასტრსა და ვილანელს.

აღსანიშნავია, რომ მესამე სეზონის სცენარზე ამჯერად სუზან ჰეთკოტმა იმუშავა, რომელსაც მანამდე სერიალების Fear the Walking Dead-სა და See-ს შექმნაშიც მიუღია მონაწილეობა.

"მიხარია, რომ მესამე სეზონის შექმნაზე კიდევ ერთი შესანიშნავი სცენარისტი მუშაობდა. შეგვიძლია დარწმუნებულები ვიყოთ, რომ პერსონაჟების ბედი სუზან ჰეთკოტის სასტიკ ხელებში უსაფრთხოდ იქნება" — განაცხადა ყველასთვის საყვარელი სერიალების, Fleabag-ისა და Killing Eve-ის მთავარმა შემოქმედმა, ფიბი უოლერ-ბრიჯმა.

რაც მთავარია, მესამე სეზონში კვლავ ვიხილავთ ჩვენთვის საყვარელ მსახიობებს: სანდრა ოს, ჯოდი კომერსა და ფიონა შოუს.

ამავდროულად კი ვიხილავთ ახალ სახეებსაც, მათ შორის ჯემა უილანს (Game Of Thrones-ში იარა გრეიჯეოის შემსრულებელი) და პრედრაგ ბიელაკს (Harry Potter and the Goblet of Fire-ში იგორ კარკაროვის როლის შემსრულებელი).

"მესამე სეზონი კვლავ სასტიკი წარსულის მქონე ორი ქალის ამბავს მოგვითხრობს, რომლებიც ერთმანეთზე დამოკიდებულები არიან, თუმცა სასოწარკვეთილად ცდილობენ, რომ ერთმანეთის გარეშე იცხოვრონ. თუ მათი გზები კვლავ გადაიკვეთება, ეს შესაძლოა მეგობრების, ოჯახის, სამსახურეობრივი პასუხისმგებლობის ფასად დაუჯდეთ", — ვკითხულობთ მესამე სეზონის მოკლე აღწერაში.

სანამ მესამე სეზონს ვნახავდეთ, მანამდე შეგვიძლია დარწმუნებულები ვიყოთ, რომ ისტორია ამით არ მთავრდება: უკვე დაანონსებულია შოუს მეოთხე სეზონიც!

ამ ყველაფრის გათვალისწინებით, ალბათ, კიდევ უფრო მოუთმენლად დაელოდებით მესამე სეზონის გამოსვლას, რომლიდანაც პირველი კადრები სულ ცოტა ხნის წინ გავრცელდა.

ფოტო: BBC America

ფოტო: BBC America

ფოტო: BBC America

ფოტო: BBC America