სულ ცოტა ხნის წინ დაიწყო ბერლინის წლევანდელი საერთაშორისო ფესტივალი, რომლის ჟიურის თავჯდომარეც ბრიტანელი მსახიობი, ჯერემი აირონსია. ფესტივალის გახსნისას ჟურნალისტებისთვის გამართულ შეხვედრაზე მსახიობმა წარსულში გაკეთებულ თავის ისეთ განცხადებებს გამოეხმაურა, რომლებიც ერთნაირსქესიანი წყვილების ქორწინებას, აბორტის უფლებასა და სექსუალურ შევიწროებას ეხებოდა.

როცა ერთი თვის წინ ცნობილი გახდა, რომ ჯერემი აირონსი ბერლინალეს ჟიურის უხელმძღვანელებდა, კინოფესტივალი კრიტიკის ქარცეცხლში გაეხვა. ჟურნალისტებმა მისი არაერთი ხმაურიანი განცხადება გაიხსენეს: მსახიობმა 2011 წელს ბრიტანულ რადიო Times-თან მიცემულ ინტერვიუში განაცხადა, რომ "თუ კაცი ქალს საჯდომზე ხელს დაადებს, ქალს თავად შეუძლია გაუმკლავდეს ამას. ეს უბრალო კომუნიკაციაა, რატომ არ შეგვიძლია ვიყოთ მეგობრულები?"

ასევე 2013 წელს Huffington Post-ს განუცხადა, რომ ერთნაირსქესიანი წყვილების ქორწინების ლეგალიზაციამ შესაძლოა მამებისა და ვაჟების ქორწინება გამოიწვიოს. აბორტის შესახებ მის მიერ წარსულში გამოთქმული მოსაზრებების მიხედვით კი ეკლესიას უფლება აქვს, რომ აბორტი ცოდვად მიიჩნიოს.

ჯერემი აირონსი ბერლინის 2020 წლის კინოფესტივალზე ჟურნალისტებისთვის გამართულ კონფერენციაზე.

ფოტო: MATTHIAS NAREYEK / GETTY.

სულ ცოტა ხნის წინ ბერლინში გამართულ კონფერენციაზე აირონსმა თქვა, რომ ამ განცხადებების გამო უკვე ბოდიში მოიხადა, თუმცა იმისათვის, რომ ბერლინალეს ხელი არ შეეშალოს, კიდევ ერთხელ დააზუსტა თავისი შეხედულებები:

"ნება მომეცით, ერთხელ და სამუდამოდ წარმოგიდგინოთ ჩემი დამოკიდებულება ამ საკითხების მიმართ. პირველ რიგში, მთელი გულით მხარს ვუჭერ გლობალურ მოძრაობას, რომლის მიზანიც ქალების უფლებების უთანასწორობის დაძლევა და მათი დაცვაა მჩაგვრელი, ზიანის მომტანი და უპატივცემულო შევიწროების მიმართ, რისი მსხვერპლებიც სახლსა თუ სამსახურში ხდებიან.

მეორეც, მივესალმები ერთნაირსქესიანთა ქორწინებას, სადაც არ უნდა ხდებოდეს ეს და იმედი მაქვს, რომ კიდევ უფრო მეტ საზოგადოებაში მოხდება მისი ლეგალიზაცია. მესამეც, აბორტი ქალის უფლებაა და მე მხარს ვუჭერ მათ გადაწყვეტილებას. სამივე მათგანი ადამიანების უფლებებია და მჯერა, რომ ცივილური და ჰუმანური საზოგადოება სწორედ ამისკენ უნდა მიიწევდეს მუდმივად".

თავისი გამოსვლა მსახიობმა ამ სიტყვებით დაასრულა:

"იმედი მაქვს, ამ განმარტებით ჩემი წარსული განცხადებები განხილვის საგანი აღარ იქნება".