კინოსტუდია New Republic Pictures-მა ახალ ფილმზე დაიწყო მუშაობა, რომელშიც გოლდი ჰოუნი, ბეტ მიდლერი და დაიან კიტონი მთავარ როლებს შეასრულებენ.

ეს ცნობილი სამეული ერთად პირველად 1996 წელს ეკრანებზე გამოსულ კომედიური ჟანრის საკულტო ფილმ The First Wives Club-ში ვიხილეთ, რომელმაც მილიონობით მაყურებლის გული მოიგო. ზუსტად 24 წლის შემდეგ ამ ფილმში მთავარი როლის შემსრულებელი მსახიობი ქალები ახალ პროექტში კვლავ ერთად ითამაშებენ.

მომავალი ფილმის სახელწოდება Family Jewels-ია და ისიც სამი ქალის შესახებ მოგვითხრობს, რომლებიც საშობაო არდადეგებს შვილებთან და შვილიშვილებთან ატარებენ. ამ საოჯახო კომედიაში ჰოუნი, მიდლერი და კიტონი მთავარ როლებს მოირგებენ.

ფოტო: SHUTTERSTOCK

ჯერჯერობით უცნობია, თუ ვინ გადაიღებს ფილმს, თუმცა ვიცით, რომ მის სცენარზე პიტერ ჰორი იმუშავებს.

"გოლდი ჰოუნს, ბეტ მიდლერსა და დაიან კიტონს შორის არსებული ქიმია უბადლო და შეუდარებელია. აღფრთოვანებული ვარ, რომ უამრავ გულშემატკივარს კვლავ შეეძლება ამ სამეულის ეკრანზე ხილვა", — განაცხადა New Republic Pictures-ის წარმომადგენელმა, ბრედლი ფიშერმა.

ფილმის გადაღებები წელს დაიწყება და საყვარელი მსახიობების ახალ, თუმცა, ალბათ, ტრადიციულად ნაცნობ ამპლუაში ხილვა შემდეგ წელს შეგვეძლება.