პარტია დემოკრატიული მოძრაობის ლიდერი ნინო ბურჯანაძე აცხადებს, რომ საქართველოზე განხორციელებული კიბერთავდასხმით, რუსებმა "ივარჯიშეს ან გაიხუმრეს". ამის არგუმენტად კი იმას ასახელებს, რომ საქართველოს "უნიათო" მთავრობის და პრეზიდენტის ვებგვერდის გათიშვას რუსეთისთვის არანაირი მნიშვნელობა არ აქვს.

მისი თქმით, თუ კიბერშეტევა მართლა რუსეთის განახორციელებულია ამას გმობს ისევე, როგორც მარსიანელების თავდასხმას დაგმობდა.

"რო გითხრათ ახლა ძაან შევწუხდი მეთქი... არ მგონია, რომ საქართველოს პრეზიდენტის ვებგვერდმა ერთი დღე თუ არ იმუშავა ან ორი, ამით ქვეყანა დაიქცა", — განაცხადა მან ტელეკომპანია პირველის ეთერში.

საგარეო საქმეთა სამინისტროს ინფორმაციით, საერთაშორისო პარტნიორებთან თანამშრომლობით გაირკვა, რომ კიბერშეტევა რუსეთის ფედერაციის შეიარაღებული ძალების გენერალური შტაბის მთავარი სამმართველოს მიერ დაიგეგმა და განხორციელდა.

2019 წლის 28 ოქტომბერს ერთდროულად 15 ათასზე მეტი ვებგვერდი დაიჰაკა. კიბერთავდასხმის მსხვერპლი პრეზიდენტის ადმინისტრაციის, სასამართლო სისტემის, სხვადასხვა მუნიციპალიტეტის საკრებულოს, სახელმწიფო, კომერციული და მედია ორგანიზაციების ვებგვერდები გახდა. მაშინ ვებგვერდებზე გამოჩნდა ყოფილი პრეზიდენტის, მიხეილ სააკაშვილის ფოტო წარწერით "I'll Be Back".

გაიგეთ მეტი: