აჭარის საზოგადოებრივი მაუწყებლის შენობასთან მრჩეველთა საბჭოს სხდომის პარალელურად ორი აქცია იმართება. აქტივისტების ნაწილი მაუწყებლის თანამშრომლებს სოლიდარობას უცხადებს და ტელევიზიის სარედაქციო დამოუკიდებლობისა და კრიტიკულობის დაცვას ცდილობს.

კონტრაქციის მონაწილეები კი, მთავრობის წარმომადგენლების მსგავსად, ტელევიზიას კრიტიკულ ტონს უწუნებენ და ამბობენ, რომ "მიკერძოებულია" და "კარგ ამბებს" არ აშუქებს. მათი თქმით, ტელევიზია მხოლოდ კრიტიკული არ უნდა იყოს და ქვეყანაში "კარგი რაც ხდება" ისიც უნდა გააშუქოს.

"მინდა, რომ ყველასთვის თავისუფალი ტელევიზია იყოს. [მთავრობის] ლანძღვისთვისაც ვურეკავდით, რომ გადაეღოთ და მადლობისთვისაც ვურეკავდით, მაგრამ არ მოვიდნენ. გვინდოდა მადლობაც გაეშუქებინათ", — აცხადებს კონტრაქციის ერთ-ერთი მონაწილე.

აჭარის საზოგადოებრივი მაუწყებლის მრჩეველთა საბჭოში კი საშტატო ცვლილებებს განიხილავენ. კერძოდ, საქმე ეხება აჭარის ტელევიზიის საინფორმაციო სამსახურის მთავარი პროდიუსერის, მაია მერკვილაძის თანამდებობის გაუქმებას. რასაც მაუწყებლის თანამშრომლები სარედაქციო დამოუკიდებლობის დაკარგვის საფრთხეს ხედავენ.

დაგეგმილი საშტატო ცვლილებების ფონზე აჭარის საზოგადოებრივი მაუწყებლის თანამშრომლების მხარდასაჭერი აქციები გაიმართა ბათუმში, ქუთაისსა და თბილისში.

აჭარის ტელევიზიაში განვითარებული მოვლენები მოკლედ

აჭარის მაუწყებელში დირექტორის, ნათია კაპანაძის გადაყენების შემდეგ მოსალოდნელ საფრთხეებზე საუბრობდნენ. ტელევიზიების თანამშრომლებს მიაჩნდათ, რომ ხელისუფლება მათზე გავლენის მოპოვებას ცდილობდა. დირექტორის გადაყენებიდან რვა თვის განმავლობაში კონკურსი სამჯერ ჩაიშალა, მეოთხე ცდაზე კი მმართველი პარტიისგან დაკომპლექტებულმა საბჭომ გიორგი კოხრეიძე აირჩია, რომლის მიმართაც თანამშრომლებს კითხვები აქვთ.

აჭარის ტელევიზიის თანამშრომლების ნაწილი ჯერ კიდევ კენჭისყრამდე ამბობდა, რომ კოხრეიძის არჩევით სარედაქციო დამოუკიდებლობას საფრთხე შეექმნებოდა. კოხრეიძემ დანიშვნის დღესვე არხის მთავარ საინფორმაციო გამოშვებაში სტუმრობისას განაცხდა, რომ ჟურნალისტებს კრიტიკულ ტონს უწუნებდა. ამავე ეთერში მან უყვირა წამყვანს, თეონა ბაკურიძეს, რაც იმით განმარტა, რომ ჟურნალისტი მის კითხვებს არ პასუხობდა. საუბრის გაგრძელების შემდეგ კი მან აჭარის მთავრობის თავმჯდომარე თორნიკე რიჟვაძე გაამართლა, რომელმაც ბაკურიძეს ეთერში "დაოკებისკენ" მოუწოდა. კოხრეიძის თქმით, ამ რეპლიკამდე რიჟვაძე წამყვანმა მიიყვანა.

კოხრეიძის არჩევის შემდეგ აჭარის ტელევიზია დატოვეს მაუწყებლის კონსულტანტმა ზვიად ქორიძემ და მედიამენეჯერმა, მარინა ვაშაყმაძემ. ტელევიზიიდან წავიდა დირექტორის ყოფილი მოადგილე, ნათია ზოიძეც. ის აცხადებდა, რომ კოხრეიძე სარედაქციო პოლიტიკისგან ჩამოშორებისკენ მოუწოდებდა ან სისხლის სამართლებრივი დევნით ემუქრებოდა.