პარლამენტის თავმჯდომარემ, არჩილ თალაკვაძემ ყოველწლიური ანგარიშის წარდგენისას თქვა, რომ საგარეო ურთიერთობაზე პასუხისმგებელი დეპუტატების უმრავლესობიდან წასვლის შემდეგ, მმართველ გუნდს დასავლელ პარტნიორებთან კომუნიკაციაში "შეფერხება" ჰქონდა. როგორც თალაკვაძემ აღნიშნა, დღეს უკვე კომუნიკაცია "აქტიურია".

მისივე თქმით, საქართველოს მიმართ დასავლეთის ძლიერი მხარდაჭერა, ოპტიმიზმი და ნდობა არსებობს და სტრატეგიული ურთიერთობები საფრთხის ქვეშ არასოდეს დადგება.

"გასული წლის ნოემბრის შემდეგ, როცა, სამწუხაროდ, ჩვენმა თანაგუნდელებმა, ვინც პასუხისმგებელი იყვნენ საგარეო ურთიერთობებზე, დატოვეს უმრავლესობა. მართლაც იყო შეფერხება კომუნიკაციაში. სამწუხაროა, რომ ასეთი რესურსი დავკარგეთ. დღეს უკვე კომუნიკაცია აქტიურია და არჩევნებამდე ჩვენ ჩვენს პარტნიორებს მივაწვდით ინფორმაციას თითოეულ საკითხზე, რომელიც საარჩევნო კონტექსტში მნიშვნელოვანია", — განაცხადა თალაკვაძემ.

მას შემდეგ, რაც 2019 წლის 14 ნოემბერს ბიძინა ივანიშვილის დაპირება არ შესრულდა და მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, უმრავლესობა დატოვა 10-ზე მეტმა დეპუტატმა, მათ შორის პარლამენტის ვიცე-სპიკერმა და ქართული ოცნების საერთაშორისო მდივანმა, თამარ ჩუგოშვილმაც.