დამოუკიდებელი დეპუტატი, ლევან კობერიძე ფიქრობს, რომ ჯანდაცვის მინისტრის, ეკატერინე ტიკარაძის პოლიტიკური პასუხისმგებლობის საკითხი უნდა დადგეს, მათ შორის იმპიჩმენტიც. ამის მიზეზად ის რეგლამენტის დარღვევას და კომიტეტის სხდომაზე არმისვლას ასახელებს.

"პარლამენტმა ვერ მოახერხა ის, რომ მინისტრი 9 თვის განმავლობაში კომიტეტზე მოსულიყო. მთავარი ის არის, რომ მან დაარღვია რეგლამენტი და მგონი ვერც ხვდება, რომ დაარღვია. კარგი იქნება, რომ პარლამენტის თავმჯდომარემ აუხსნათ ეს საკითხი და დააყენოთ დღის წესრიგში პოლიტიკურ გუნდში", — განაცხადა მან ბიუროს სხდომაზე.

On.ge-სთან საუბრისას ის განმარტავს, რომ რეგლამენტი მინისტრისთვის საურავის დაწესებას არ ითვალისწინებს, ამიტომ ოცნებამ თავად უნდა გადაწყვიტოს ტიკარაძეს რაიმე სანქციას დაუწესებს, თუ მის იმპიჩმენტს განიხილავს.

პარლამენტის თავმჯდომარის, არჩილ თალაკვაძის განმარტებით, ჯანდაცვის მინისტრმა კომიტეტს წერილობით აცნობა, რომ სხდომაზე მისვლას ვერ შეძლებდა, რადგან შერჩეულ საკითხზე ინფორმაციის მოსაძიებლად მეტი დრო სჭირდებოდა.