საკონსტიტუციო სასამართლოს ახალი თავმჯდომარე ზაზა თავაძე გაზეთ კვირის პალიტრასთან ინტერვიუში სასამართლოს სამომავლო გეგმებზე საუბრობს. საპარლამენტო არჩევნების შემდეგ, მმართველმა პარტიამ საკონსტიტუციო უმრავლესობა მოიპოვა პარლამენტში, რაც საშუალებას მისცემს კონსტიტუციაში ცვლილებები შეიტანოს. ჟურნალისტის კითხვაზე, თუ რა გარანტია არსებობს იმისა, რომ სასამართლო ხელისუფლებისგან დამოუკიდებელი იქნება, თავაძის განცხადებით, ცვლილებების შემთხვევაში გადაწყვეტილება საზოგადოებრივ კონსენსუსზე უნდა იყოს დაფუძნებული:

"მნიშნელოვანია კონსტიტუციის ხშირი ცვლილებისგან თავის შეკავება. ცვლილების შემთხვევაში აუცილებელია ფართო დისკუსია და საზოგადოებრივ კონსენსუსზე დაფუძნებული გადაწყვეტილების მიღება".

ზაზა თავაძე ინტერვიუში ასევე აღნიშნავს, რომ უნდა შემცირდეს სასამართლოს მიმართ პოლიტიკური ხასიათის დაუსაბუთებელი რიტორიკა და გააქტიურდეს სამართლებრივი დისკუსია:

"ვეცდები შევასრულო შუამავალი რგოლის როლი მოსამართლეებს შორის და ხელი შევუწყო კონსენსუსზე დაფუძნებული გადაწყვეტილებების მიღებას. ძალისხმევას მივმართავ თანამშრომელთა კომპეტენციის ზრდისა და კვალიფიციური კადრების მოზიდვისკენ. დღეს გაზრდილია საკონსტიტუციო სასამართლოსადმი მიმართვიანობა. მხოლოდ წელს, შემოსულია 150-მდე სარჩელი და წარდგინება, რაც საჭიროებს თითოეული წევრის თავდაუზოგავ შრომას".