ქართული ოცნების გენერალურმა მდივანმა კახა კალაძემ და დეპუტატმა ირაკლი კობახიძემ სტრასბურგში გამართული შეხვედრების შესახებ აეროპორტში ფეისბუქლაივი ჩართეს. მათ მოსახლეობას განუმარტეს, თუ რა მოხდა ევროპარლამენტარებთან შეხვედრისას და რა გააკეთეს ვიზიტისას:

"მე და ირაკლი კობახიძემ დღეს, გუშინ, გუშინწინ გავმართეთ ძალიან საინტერესო შეხვედრები... შეხვედრებმა ძალიან კარგად ჩაიარა. კითხვები ისმოდა საარჩევნო სისტემაზე, ასევე, უგულავას დაკავებაზე. გუშინ ჩვენი ინიციატივა მართლაც შეფასდა ძალიან მაგრად. ჩვენ კი ვუხსნიდით ევროპარლამენტარებს, რომ საქმე ეხებოდა სინამდვილეში 50 მილიონის მოპარვას", — ჰყვება კახა კალაძე

ირაკლი კობახიძემ ისაუბრა ასოცირების კომიტეტის სხდომაზე რეზოლუციის ჩაგდებაზე. მან თქვა, რომ ოპოზიციამ "სიცრუით გაჯერებული" ინიციატივები წარმოადგინა, რაც მათივე "მეგობარი ევროპარლამენტარების თანადგომით ჩავარდა".

"დეკლარაცია არის დოკუმენტი, რაშიც აისახება ის პროგრესი, რომელსაც ფაქტობრივად განიცდის ქვეყანა. ეს დოკუმენტი მზადდება თანამშრომლობით და თანაავტორობით. საბოლოოდ, ეს დეკლარაცია არ მიიღეს, თუმცა ბუნებრივია, ეს არ შეუშლის ხელს ჩვენს ევროკავშირთან ინტეგრაციას", — ამბობს ირაკლი კობახიძე ვიდეომიმართვაში.

დღეს, 13 თებერვალს ევროპარლამენტში ასოცირების ხელშეკრულებით გათვალისწინებული ერთობლივი რეზოლუცია ჩავარდა. საბოლოო ვერსიის მხარდასაჭერად ევროპარლამენტისა და საქართველოს პარლამენტის დეპუტატების უმრავლესობის მხარდაჭერა იყო საჭირო.

რეზოლუციის შესწორებები მოამზადეს მმართველი გუნდის წარმომადგენლებმა, ოპოზიციამ და, ასევე, ევროპარლამენტარების ნაწილმა. ქართულმა ოცნებამ სწორედ ოპოზიციის შესწორებებს არ დაუჭირა მხარი.