ამერიკის ომის კოლეჯის პროფესორი, არმიის გადამდგარი პოლკოვნიკი რობერტ ჰამილტონი ამბობს, რომ ყველაზე ცუდი სცენარი, რაც დემოკრატიული უკუსვლის შემთხვევაში შეიძლება დადგეს საქართველოს ნატოში გაწევრიანების მხარდაჭერის შემცირება იქნება. საქართველოში მიმდინარე მოვლენებზე რობერტ ჰამილტონმა ამერიკის ხმასთან ინტერვიუში ისაუბრა.

"საქართველოს შეიძლება შეუმცირდეს ან შეუწყდეს ზოგიერთი დახმარება, რომლსაც ამერიკა საქართველოს უკვე ათწლეულებია უგზავნის. ან შეიძლება დახმარების დონე უბრალოდ შემცირდეს. ამაზე მნიშვნელოვანი კი სხვა რამაა. შეერთებული შტატების მხარდაჭერა საქართველოსთვის ნატოში გაწევრიანების გზაზე უკიდურესად მნიშვნელოვანია. თუ ამერიკამ გადაწყვიტა, რომ საქართველო დემოკრატიულ სტანდარტებს ვერ აკმაყოფილებს — როგორიცაა მაგალითად გამჭვირვალობა, ანტი-კორუფციული რეფორმები, კარგი მმართველობა, რაც ასევე საჭიროა ნატოში გასაწევრიანებლად — შეიძლება საქართველოს ნატოში გაწევრიანების მხარდაჭერა შეამციროს. ვფიქრობ, ამას უფრო დიდი ზიანის მოტანა შეუძლია ქვეყნისთვის, ვიდრე დოლარების ოდენობის შემცირებას", — ამბობს რობერტ ჰამილტონი.

ყოფილი პოლკოვნიკის აღნიშნავს, რომ მის მეხსიერებაში პირველი შემთხვევაა, როცა კონგრესმენები თუ სენატორები საჯარო კრიტიკული წერილებით მიმართავენ საქართველოს. ჰამილტონი ხაზს უსვამს, რომ საქართველოს მიმართ კონგრესის ძლიერი ორპარტიული მხარდაჭერა უპირობო და გაუაზრებელი არაა. ჰამილტონმა თქვა, რომ როცა დემოკრატიული უკუსვლის მტკიცებულება ჩნდება, კონგრესი ვალდებულია სიმართლე თქვას. მისი თქმით, შტატები დემოკრატიის მხარდაჭერის, ადამიანის უფლებების, სხვა დემოკრატიული ღირებულებების ერთგული რჩება.

ბოლო პერიოდში კონგრესისა და სენატორების მხრიდან მმართველმა გუნდმა არაერთი კრიტიკული წერილი მიიღო. მოგვიანებით სამთავრობო გუნდის წარმომადგენლები აშშ-ში ვიზიტით გაემგზავრნენ. ამის მოუხედავად საერთაშორისო პარტნიორების კრიტიკა გიგი უგულავას დაპატიმრების შემდეგ კვლავ გრძელდება. ამჯერად, ევროპარლამენტში ვიზიტით ირაკლი კობახიძე, კახა კალაძე და სხვები იმყოფებიან.