ხელმომწერი არასამთავრობო ორგანიზაციები აცხადებენ, რომ უზენაესი სასამართლოს განაჩენი გიგი უგულავას საქმეზე არის ხელისუფლების მიერ ოპონენტების წინააღმდეგ პოლიტიკური დევნის გაგრძელება.

12 არასამთავრობო ორგანიზაცია წერს, რომ განაჩენი რამდენიმე თვალსაზრისით არის პრობლემური. მათი თქმით, საქმე თავიდანვე დარღვევებით მიმდინარეობდა, ხელისუფლებამ დასავლელი პარტნიორების განცხადებები დააიგნორა და უგულავას დაკავებით უარი თქვა ოპოზიციასთან მოლაპარაკებებზე.

განცხადებაში საუბარია იმაზე, რომ 2014 წელს გიგი უგულავა წინასწარ პატიმრობაში დაუსაბუთებლად და კონსტიტუციის მოთხოვნათა დარღვევით 9 თვეზე მეტი ხანს დატოვეს.

არასამთავრობოები პრობლემად მიიჩნევენ იმასაც, რომ უზენაესი სასამართლოს მოსამართლეებიდან ერთ-ერთი მათგანი ქვეყნის არაფორმალური მმართველის, ბიძინა ივანიშვილის ყოფილი პირადი ადვოკატი, საქართველოს მთავრობის საპარლამენტო მდივანი და გენერალური პროკურორი შალვა თადუმაძეა.

"ოპოზიციური პარტიების წარმომადგენლების წინააღმდეგ დროში გაწელილმა გამოძიებამ და სასამართლო პროცესებმა საკმაოდ გავრცელებული პრაქტიკის სახე მიიღო. როგორც ჩანს, ხელისუფლება ამ მეთოდს საკუთარ ოპონენტებზე არაპირდაპირი ზეწოლის მიზნით, ეფექტიანად იყენებს. გიგი უგულავასთვის თავისუფლების აღკვეთის შეფარდებაც შესაძლოა ერთგვარი გზავნილი იყოს სხვა ოპოზიციური ლიდერების მიმართ", — ვკითხულობთ განცხადებაში.

არასამთავრობოების განცხადებით, გიგი უგულავას დაკავებით საქართველოს მთავრობამ კიდევ ერთხელ უგულვებელყო ქვეყნის ინტერესები და დასავლელი პარტნიორების რეკომენდაციები.

ისინი, ასევე, აღნიშნავენ, რომ ოპოზიციური პარტიის ერთ-ერთი ლიდერის დაპატიმრებით ხელისუფლებამ საარჩევნო სისტემაზე მოლაპარაკების გაგრძელებაზე უარი თქვა:

"მსგავსი გადაწყვეტილებები ხელს უწყობს ვითარების რადიკალიზებას და ამცირებს სხვადასხვა პოლიტიკურ ძალებს შორის დიალოგისა და კონსტრუქციული ურთიერთობის რესურსს".

განცხადების ხელმომწერი ორგანიზაციებია:

  • საერთაშორისო გამჭვირვალობა - საქართველო (TIG);
  • საქართველოს დემოკრატიული ინიციატივა (GDI);
  • სამართლიანი არჩევნებისა და დემოკრატიის საერთაშორისო საზოგადოება (ISFED);
  • საქართველოს რეფორმების ასოციაცია;
  • სტრატეგიული კვლევების რეგიონული ცენტრი;
  • საქართველოს ატლანტიკური საბჭო;
  • ეკონომიკური პოლიტიკის კვლევის ცენტრი;
  • საზოგადოება და ბანკები;
  • დემოკრატიისა და უსაფრთხო განვითარების ინსტიტუტი (IDSD);
  • ადამიანის უფლებათა ცენტრი;
  • ღია საზოგადოების ფონდი;
  • მედიის განვითარების ფონდი.