საქართველოს ექსპრეზიდენტი და ოდესის ოლქის გუბერნატორი მიხეილ სააკაშვილი 2016 წლის საპარლამენტო არჩევნებს კრიტიკულად აფასებს და მას გაყალბებულს უწოდებს.

მისი თქმით, ივანიშვილმა "უბრალოდ დახატა ციფრები" უმეტეს უბანზე, რაც უცხოელი დამკვირვებლების არყოფნამ განაპირობა:

"გუშინდელი მეორე ტური ჩატარდა ზუსტად ისე, როგორც ვვარაუდობდი და ყველას ვაფრთხილებდი - ტოტალური გაყალბებით. უცხოელი დამკვირვებლების არყოფნის პირობებში, ივანიშვილმა ფული აღარ დახარჯა "კარუსელების" ტრიალზეც კი და უმეტეს ადგილას უბრალოდ დახატა ციფრები. ასეთი თავხედური და მასშტაბური გაყალბება შევარდნაძეს არც დასიზმრებია".

სააკაშვილი მიიჩნევს, რომ აუცილებელია ღია დისკუსიის გამართვა არა იმაზე, თუ როგორ დამარცხდა ერთიანი ნაციონალური მოძრაობა, არამედ იმაზე, თუ როგორ ვერ შეაჩერეს ივანიშვილის მიერ არჩევნების ინსტიტუტის გაუქმება:

"მე ხელისუფლება მშვიდობიანად გადავაბარე 2012 წელს, გადავაბარე ადამიანს, რომელიც თავიდანვე ნათელი იყო , რომ არჩევნებით წასვლას არ აპირებს. და მაინც გადავაბარე, იმიტომ რომ ასეთი იყო ქართველი ხალხის ნება. ივანიშვილს მაინც მოუხდება წასვლა, რადგან, ასეთი იქნება ქართველი ხალხის ნება. ჩვენი, როგორც პოლიტიკოსების ფუნქციაა, ხელი შევუწყოთ ჩვენი ხალხის ნების აღსრულებას მშვიდობიანი და საქართველოსთვის მინიმალური დანაკარგების გზით.

2003 წელს, ჩვენ ვემზადებოდით ხელისუფლების მიერ მასობრივი გაყალბებისთვის და ამიტომ შევძელით მობილიზება, ახლა კარგად უნდა გავაცნობიეროთ, რომ ივანიშვილის პირობებში ყველა შემდგომი არჩევნები გაყალბდება და გამოსავალი არა ხელების ჩამოშვება, არამედ ამ გაყალბებებზე რეაგირება და აფერისტულ - დანაშაულებრივი რეჟიმის საპირისპიროდ ყოველდღიური წინააღმდეგობების ორგანიზებაა. გვეყო თავზე ნაცრის ყრა, ახლა გადაჯგუფება და აქტიური ბრძოლის დაწყებაა საჭირო" - წერს საქართველოს ყოფილი პრეზიდენტი ფეისბუკზე.