პარლამენტის ყოფილი თავმჯდომარე და უმრავლესობის წევრი, ირაკლი კობახიძე ამბობს, რომ ოდირმა ოპოზიციას მოლოდინები გაუცრუა და ახლა მათ მოლაპარაპარაკებები რჩებათ. მისი თქმით, თუ ოპოზიცია მმართველი გუნდის მიერ შეთავაზებულ საარჩევნო მოდელს დათანხმდება, შეთანხმებას მოახერხებენ.

"ჩვენ გვაქვს წარდგენილი შეთავაზება. ეს არის 100/50-ზე მოდელი. ამასთან დაკავშირებით ველოდებით პასუხს ოპოზიციის მხრიდან. თუ მათი მიდგომა იქნება კონსტრუქციული და რაციონალური, ამ შემთხვევაში ჩვენ მოვახერხებთ შეთანხმებას. ოდირს რაც შეეხება, იყო ოპოზიციის მხრიდან მოლოდინი, ეს მოლოდინი გაუცრუვდათ. ახლა რჩება მოლაპარაკების თემა. ჩვენ გვაქს სარგიანი შეთავაზება და ველოდებით პასუხს ამ შემოთავაზებაზე", — განუცხადა ირაკლი კობახიძემ მთავარ არხს.

ეუთო/ოდირის დასკვნა საარჩევნო სისტემის ცვლილებაზე 5 თებერვალს გამოქვეყნდა. ეუთოს დოკუმენტში აღნიშნულია, რომ საარჩევნო მოდელთან დაკავშირებით გადაწყვეტილების მიღება ქვეყნის სუვერენული უფლებაა, თუმცა ასევე, წერია ისიც, რომ კანონის კონსტიტუციასთან შესაბამისობაზე საბოლოო გადაწყვეტილება ადგილობრივმა სასამართლოებმა უნდა მიიღონ.

დოკუმენტში აღნიშნულია ისიც, რომ შემოთავაზებული ე.წ. გერმანული მოდელი აკმაყოფილებს უნივერსალური, თავისუფალი, ფარული და პირდაპირი ხმის მიცემის, ასევე, პერიოდული არჩევნების პრინციპებს.

მას შემდეგ, რაც ბიძინა ივანიშვილმა პირობა არ შეასრულა და ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გაერთიანდნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

მმართველ გუნდსა და ოპოზიციას შორის საარჩევნო სისტემასთან დაკავშირებით დიპლომატების მედიატორობით მოლაპარაკებების ფორმატი დაიწყო. მოლაპარეკებათა ოთხი რაუნდი უკვე გაიმართა. მმართველმა გუნდი ოპონენტებს ახალ სამოქმედო გეგმას სთავაზობს. საუბარია იმაზე, რომ პარლამენტში პროპორციული წესით 100 დეპუტატი აირჩიონ, ნაცვლად 77-სა. ხოლო მაჟორიტარული მანდატები 50-მდე შემცირდება.