მთიანი ყარაბაღის ყოფილ მაღალჩინოსანს, რომელიც რეგიონის დაკარგვიდან რამდენიმე თვის შემდეგ სომხეთში ჯაშუშობის ბრალდებით დააკავეს, 18 წლით თავისუფლების აღკვეთა მიესაჯა.

22 ნოემბერს პროკურატურამ სასამართლოს გადაწყვეტილების შეფასებისას Armenpress-ს განუცხადა, რომ გასაჩივრებას და სამუდამო პატიმრობის მოთხოვნას გეგმავს.

ბრალდების მიხედვით, სარგის გალსტიანს 2020 წლის ნოემბერში უცხო ქვეყნის (აზერბაიჯანის) დაზვერვის სამსახური დაუკავშირდა და ჯაშუშობაზე დაითანხმა.

2023 წლამდე გალსტიანი აგროვებდა და გადასცემდა ინფორმაციას მთიანი ყარაბაღის მოსახლეობის შესახებ, მათ შორის საზოგადოებრივ განწყობებს, შეხედულებებს მთიანი ყარაბაღისა და სომხეთის ხელისუფლებაზე და სომხეთის სამხედრო დახმარების შესაძლებლობებზეც 2023 წლის სექტემბრის მოვლენების მიმდინარეობისას.

გალსტიანი, რომელსაც წარსულში მთიან ყარაბაღში არაერთი თანამდებობა ეკავა, 2023 წლის სექტემბერში მთიანი ყარაბაღის უკანასკნელი პრეზიდენტის, სამველ შაჰრამანიანის ადმინისტრაციის ხელმძღვანელის მოადგილის პოზიციას იკავებდა. ის 2023 წლის აპრილში დააკავეს, როცა მთიანი ყარაბაღიდან სომხეთისკენ გადაადგილდებოდა.

სომეხი ჟურნალისტი ტატულ ჰაკობიანის თქმით, გალსტიანი რეგიონის ეროვნული უსაფრთხოების უწყებასთანაც მუშაობდა და კარგი ურთიერთობა ჰქონდა წინა პრეზიდენტ ბაკო საჰაკიანთანაც.

რეგიონიდან სომხური მოსახლეობის დიდი ნაწილის გასვლის შემდეგ, გალსტიანი და მისი ცოლი, მარგარიტა, ყარაბაღში დარჩნენ.

ბრალდების მიხედვით, გალსტიანმა დარჩენა გადაწყვიტა იმიტომ, რომ უცხოურმა სადაზვერვო სამსახურმა თანამდებობა შესთავაზა.

ივნისში გალსტიანის ადვოკატმა, ალექსანდერ კოჩუბაევმა რადიო თავისუფლებას განუცხადა, რომ გალსტიანი ბრალს არ აღიარებდა. კოჩუბაევმა განაცხადა ისიც, რომ გალსტიანის ჩვენება, რომელიც მოგიანებით გავრცელდა, "ზეწოლის ქვეშ დაიწერა".

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.