პრემიერ-მინისტრი გიორგი გახარია ლევან იზორიას ძმის, კიტა იზორიას დაკავების ვიდეოს გამოეხმაურა. გახარიამ გავრცელებულ ვიდეოზე ჟურნალისტებთან ისაუბრა. მისი თქმით ლევან იზორიას ძმის საქციელი ამაზრზენია და გამართლება არ აქვს.

"მე რაც ამ კადრებში ვნახე, ეს არის ამაზრზენი, ამას არ აქვს არანაირი გამართლება. იზორიას კი არა, ჩემი ძმა რომ იყოს, მექნებოდა უარესი რეაქცია", — ამბობს გახარია.

პრემიერ-მინისტრმა გიორგი გახარიამ აღმასრულებელი ხელისუფლების წევრებისგან განსხვავებით, ლევან იზორიას ძმის ინციდენტში პოლიციელი გაამართლა. შინაგან საქმეთა მინისტრმა ვახტანგ გომელაურმა განაცხადა, რომ ვახო იზორიას ფრაზა პატრულისადმი: "ფორმას გაგხდი", დანაშაული არ იყო. შინაგან საქმეთა მინისტრის თქმით, მსგავსი ინციდენტი ხშირად ხდება, მათ შორის აქციებზე და მსგავსი ქმედებისთვის არავის აკავებენ. უმრავლესობის ლიდერმა მამუკა მდინარაძემ თქვა, რომ სასიამოვნო მოსასმენი არ იყო, როგორც ელაპარაკებოდა ლევან იზორიას ძმა პოლიციელებს, თუმცა რა გახდა მისი დაკავების მიზეზი ეს გამოძიებამ უნდა დაადგინოს. იურიდიული კომიტეტის თავმჯდომარემ, ანრი ოხანაშვილი ლევან იზორიას მიმართ ბრალდება, "ნაციონალების დღის წესრიგით" გაამართლა. სოფო კილაძემ კი აღნიშნა, რომ უკვირს, რატომ არ გაასაჯაროვა პოლიციელმა კადრები უფრო ადრე.

23 იანვარს მთავარი არხის მიერ გავრცელებულ ვიდეომასალაში ჩანს, თუ როგორ აკავებს საპატრულო პოლიციის თანამშრომელი მაშინდელი შინაგან საქმეთა მინისტრის მოადგილის, ლევან იზორიას ძმას და როგორ აიძულებენ მის გათავისუფლებას ჩარევის შემდეგ. ვიდეო ტელევიზიას იმ პოლიციელმა მიაწოდა, რომელმაც 2014 წელს იზორიას ძმა დააკავა.

კადრებში ჩანს, როგორ უხსნის პოლიციელი გიორგი დვალიშვილი მაღალჩინოსნის ძმას, რომ საჯარო სივრცეში არ უნდა იგინებოდეს, რამაც ის გააღიზიანა და გინება გააგრძელა. ამის შემდეგ პოლიციელი მას განუმარტავს, რომ წვრილმანი ხულიგნობისთვის აკავებს, რაზეც პასუხად იღებს: "მიდი დავაი". თუმცა, მას შემდეგ, რაც პოლიციელი მისკენ ბორკილებით მიდის ის გაკვირვებულია, წინააღმდეგობას უწევს მას და ამბობს, რომ ლევან იზორიას ძმა არის.