ლეიბორისტული პარტიის ოფისში ოპოზიციური პარტიების გაერთიანების მორიგ სხდომაზე 4 თებერვლის აქცია დაიგეგმა. აქცია პარლამენტთან საგაზაფხულო სესიის გახსნის პარალელურად გაიმართება. ოპოზიციის მოთხოვნა უცვლელია და ითხოვენ 2020 წლისთვის პროპორციულ საარჩევნო სისტემას.

ევროპული საქართველოს ლიდერის, გიგი უგულავას თქმით, ოპოზიცია გაზაფხულზე გეგმავს ერთიან, მასშტაბურ აქციას, სადაც მისი თქმით, რეგიონებიდანაც შეუერთდებიან მოქალაქეები. უგულავას განცხადებით, ოპოზიცია უმრავლესობასთან ისაუბრებს მხოლოდ პროპორციულ სისტემაზე, ან ისეთ სისტემაზე, რომელიც მაქსიმალურადაა დაახლოებული პროპორციულთან.

"ნაცვლად პროპორციული სისტემისა, ქართულ ოცნებას უნდა, შემოგვასაღოს იდეა, სადაც 10-დან 3 დაუჭერთ მხარს და 30-33 პროცენტით ჰქონდეთ უმრავლესობა", — ამბობს ევროპული საქართველოს ლიდერი.

მმართველმა გუნდმა ოპონენტებს ახალი სამოქმედო გეგმა შესთავაზა. საუბარია იმაზე, რომ პარლამენტში პროპორციული წესით 100 დეპუტატი აირჩიონ, ნაცვლად 77-სა. ხოლო მაჟორიტარული მანდატები 50-მდე შემცირდება. ოპოზიცია ამ შეთავაზებას კატეგორიულად არ თანხმდება.

მას შემდეგ, რაც ბიძინა ივანიშვილმა პირობა არ შეასრულა და ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გაერთიანდნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

მმართველ გუნდსა და ოპოზიციას შორის საარჩევნო სისტემასთან დაკავშირებით დიპლომატების მედიატორობით მოლაპარაკებების ფორმატი დაიწყო. იანვრის ბოლოს, მოლაპარეკებათა მეხუთე რაუნდი უნდა გაიმართოს.