კანადაში, ქალაქ ტორონტოში, ახალი ტიპის კორონავირუსის პირველი შემთხვევა დაფიქსირდა. როგორც დასავლური მედია წერს, პირი, რომელსაც დაავადების სიმპტომები გამოუვლინდა, ცოტა ხნის წინ ჩინეთის ქალაქ უჰანიდან დაბრუნდა, რომელიც ვირუსის გავრცელების ეპიცენტრია.

როგორც მედია წერს, ვირუსის მატარებელმა კაცმა აეროპორტიდან პირადი ტრანსპორტით იმგზავრა, ჩასვლისთანავე ოჯახის წევრებს განუცხადა, რომ ავად გახდა და სასწრაფოში დარეკა. მათივე ინფორმაციით, კანადის ჯანდაცვის უწყება იკვლევს, თუ რამდენ პირთან ჰქონდა კონტაქტი ვირუსით დაავადებულ კაცს. კაცის ოჯახის წევრები იზოლირებულები არიან.

ჩინეთში კორონავირუსით უკვე 56 ადამიანი გარდაიცვალა. დაავადებულთა რიცხვი კი ორი ათასს აღწევს. ჩინეთმა კორონავირუსთან ბრძოლის მიზნით 13 ქალაქში გადაადგილება 36 მილიონ ადამიანს შეუზღუდა.

კორონავირუსი ასევე გამოვლენილია სამხრეთ კორეაში, იაპონიაში, ტაილანდში, მალაიზიაში, ნეპალში, ვიეტნამში, აშშ-ში, საფრანგეთსა და ავსტრალიაში.

ჯანდაცვის მსოფლიო ორგანიზაციის გენერალური დირექტორი, ადჰანომ გებრეიესუსი აცხადებს, რომ გლობალური განგაშის საფუძველი ჯერჯერობით არ არსებობს.

გაიგეთ მეტი: