ქართული ოცნების მაჟორიტარი დეპუტატის, დიმიტრი ხუნდაძის თქმით, კიდევ ერთი კრიტიკული წერილი, რომელიც ამერიკელმა კონგრესმენებმა 24 იანვარს გამოქავეყნეს, აცდენილია ფაქტობრივ რეალობას.

"წერილის შინაარსი და უდიდესი ნაწილი, რა თქმა უნდა, აცდენილია ფაქტობრივ რეალობას, თუმცა, რა თქმა უნდა, უშუალო კომუნიკაციით შეიძლება მეტი ინფორმაციის მიწოდება და მე მჯერა, რომ მისი შინაარსი იგივე კონგრესმენების მიერ იქნება შეცვლილი. რაც შეეხება პირად ინტერესებს, მე მგონი ეს არ წაადგება პარტნიორულ ურთიერთობას და ეს არ იქნება საუკეთესო შენატანი ჩვენსა და ჩვენს უმთავრეს პარტნიორ ამერიკის შეერთებულ შტატებს შორის. კიდევ ერთხელ ვამბობ, ეს არის კონგრესმენების ერთი ჯგუფის მოსაზრება და არა ამერიკის შეერთებული შტატების", — თქვა დიმიტრი ხუნდაძემ მთავარ არხთან საუბრისას.

დიმიტრი ხუნდაძემ წინა კრიტიკული წერილიც, რომელიც კონგრესმენ ადამ კინზიგერს ეკუთვნოდა, "პირად ინტერესთან" და ნაციონალურ მოძრაობასთან დააკავშირა. არგუმენტად მან თქვა, რომ კინზიგერიც მაჟორიტარია.

გუშინ, 24 იანვარს საქართველოს მთავრობას კრიტიკული გზავნილები კიდევ ორმა კონგრესმენმა გამოუგზავნა. კონგრესმენმა ბრაიან ბაბინიმ დაწერა, რომ ქვეყნის ისტორიაში პირველად, საქართველო და ქვეყნისთვის გაწეული რესურსები საფრთხილო და ნეგატიურ კონტექსტში განიხილება. კონგრესმენმა პეტ ოლსონმა კი განაცხადა, რომ კორუმპირებული საქართველოს მთავრობა თავს ესხმის დემოკრატიულ ღირებულებებს.

21 იანვარს ევროპარლამენტში საგარეო ურთიერთობათა კომიტეტის სხდომაზე მყოფი საქართველოს დელეგაცია ევროპარლამენტარებმა ქვეყანაში არსებული პოლიტიკური ფონის გამო გააკრიტიკეს. მათ პროპორციულ საარჩევნო სისტემაზე დაუსვეს კითხვები. ისინი დაინტერესდნენ, რატომ არ შეასრულა მთავრობამ დაპირება და რატომ დაიწყო რამდენიმე გამოძიება ოპოზიციის ლიდერების წინააღმდეგ.

22 იანვრის დილას ცნობილი გახდა, რომ პრემიერ-მინისტრ გიორგი გახარიას ოთხმა ამერიკელმა კონგრესმენმა წერილი გამოუგზავნა. კონგრესმენ კინზინგერის ინფორმაცით, კონგრესმენები გახარიასთვის მიწერილ წერილში შეშფოთებას გამოთქვამენ საქართველოში არსებული ვითარების გამო.

გაიგეთ მეტი: