პარლამენტის ყოფილი ვიცე-სპიკერი, თამარ ჩუგოშვილი საქართველოს მთავრობისათვის გამოგზავნილ კონგრესმენების წერილზე ამბობს, რომ ეს წერილი მთავრობის "პასუხის პასუხია". მისივე თქმით, "პასუხის პასუხი კიდევ უფრო მძიმეა", ვიდრე პირველი ვერსია იყო.

"მთავრობის რეაგირებამ პირველ წერილზე იმის ნაცვლად, რომ კითხვებისთვის ეპასუხათ და წუხილები მოეხსნათ, კიდევ უფრო გაზარდა წუხილები და კიდევ უფრო მეტი წინააღმდეგობა გამოიწვია კონგრესის წევრებში", — განაცხადა ჩუგოშვილმა.

აშშ-ის კონგრესის წარმომადგენელთა პალატის ოთხმა წევრმა, მათ შორი საქართველოს ჯგუფის თანათავმჯდომარეებმა, პრემიერ-მინისტრს, გიორგი გახარიას გუშინ, 21 იანვარს, მორიგი წერილი გამოუგზავნა. კონგრესმენები გახარიასთვის მიწერილ წერილში შეშფოთებას გამოთქვამენ საქართველოში არსებული პოლიტიკური მოტივით დევნისა და ეკონომიკური ვარდნის ტენდენციის გამო.

კონგრესმენებმა გიორგი გახარიას წერილი ერთი თვის წინ, დეკემბერშიც გამოუგზავნეს, სადაც პროპორციულ სისტემაზე გადასვლის დაპირების შეუსრულებლობას აკრიტიკებენ და გაოგნებას გამოხატავდნენ.