საგარეო საქმეთა მინისტრის დავით ზალკალიანის თქმით, ამიერიკელი კონგრესმენების ყველა კითხვას გასცემენ პასუხს. ის არ ეთანხმება მოსაზრებას, რომ საქართველოში ეკონომიკური ვარდნაა და ამბობს, რომ წერილობით ურთიერთობაზე უფრო მნიშვნელოვანი პირადი კონტაქტებია.

"ძალიან მრავალფეროვანი და მრავალმხრივი ინფორმაციები აქვთ მათ სხვადასხვა წყაროებიდან, მაგრამ ვფიქრობ, რომ აუცილებელია პირადი კომუნიკაცია და პირადი კონტაქტები, რასაც ჩვენ აუცილებლად გავაკეთებთ. იგეგმება მაღალი დონის ვიზიტები და სწორედ ეს ვიზიტები იქნება გამოყენებული იმისთვის, რომ პირადად, უშუალოდ, კონგრესმენებთან შეხვედრებზე იყოს გაცემული ყველა კითხვაზე პასუხი", — თქვა დავით ზალკალიანმა.

აშშ-ს ოთხმა კონგრესმენმა გიორგი გახარიას კრიტიკული წერილი გაუგზავნა. ამის შესახებ ინფორმაცია წარმომადგენელთა პალატის საქართველოს ჯგუფის თანათავმჯდომარემ, რესპუბლიკელმა ადამ კინზინგერმა გაავრცელა. მისი ინფორმაციით, კონგრესმენები შეშფოთებას გამოთქვამენ პოლიტიკური მოტივით დევნისა და ეკონომიკური ვარდნის ტენდენციის გამო, რაც საქართველო დემოკრატიული რეფორმებისა და დასავლური ინტეგრაციას ხელს უშლის.