მსოფლიო ლიტერატურაში ერთ-ერთი ყველაზე სახელგანთქმული მწერლის, ჯ.რ.რ. ტოლკინის შვილი, კრისტოფერ ტოლკინი 15 იანვარს გარდაიცვალა.

კრისტოფერი ფენტეზის ჟანრის საკულტო მწერლის მესამე და ყველაზე პატარა ვაჟი იყო, რომელსაც მამა ბავშვობაში ბილბო ბეგინსის შესახებ მოუთხრობდა ზღაპრებს, რომლებიც შემდგომ ცნობილ წიგნად, ჰობიტად გადაიქცა.

95 წლის ასაკში კრისტოფერ ტოლკინის გარდაცვალება ტოლკინის შემოქმედების შემსწავლელმა აკადემიურმა საზოგადოებამ დაადასტურა. მათ მიერ გამოქვეყნებულ განცხადებაში წერია, რომ ჯ.რ.რ ტოლკინის შემოქმედება "ისეთი, როგორსაც დღეს ვიცნობთ, კრისტოფერის გარეშე არ იქნებოდა".

მას მართლაც დიდი ღვაწლი მიუძღვის მამის შემოქმედების ფართო საზოგადოებისთვის გაცნობაში: 1973 წელს ტოლკინის გარდაცვალების შემდეგ, სწორედ მისმა ვაჟმა შეკრიბა მისი გამოუქვეყნებელი ნამუშევრები, დაარედაქტირა და გამოაქვეყნა. მათ შორისაა ცნობილი წიგნი სილმარილიონი, რომელიც გამოგონილი სამყაროს, შუახმელეთის შესახებ უხვ ინფორმაციას გვაცნობს.

კრისტოფერ ტოლკინის დამსახურებაა ასევე, რომ ბეჭდების მბრძანებლის ტრილოგიის ცნობილი რუკა ამ სახით გვაქვს: ისიც სწორედ მან დახატა.

ფოტო: Estate of J.R.R. Tolkien

"მან ტოლკინის შემოქმედებით პროცესში კიდევ უფრო ღრმად ჩაგვახედა და მეცნიერული კომენტარებით კიდევ უფრო გაამდიდრა ჩვენი ცოდნა შუახმელეთის შესახებ", — წერია ტოლკინის შემოქმედების შემსწავლელი აკადემიური საზოგადოების განცხადებაში.