პარლამენტში უმრავლესობის ლიდერი, მამუკა მდინარაძე ამბობს, რომ NDI-ს კვლევაზე "სერიოზულად ვერ ისაუბრებს". მისი თქმით, კვლევის სანდოობა საზოგადოებამ განსაზღვროს.

"როდესაც 15%-ს უწერდნენ ქართულ ოცნებას და მაშინ იღებდა 49%-ს. ახლა უწერენ 20%-ს, ანუ ჩვენ 49%-ზე გაცილებით მეტს ვიღებთ. წარმოიდგინეთ კალაძეს რას უზამდნენ, გაცილებით მაღალი რეიტინგი რომ არ ჰქონდეს", — განაცხადა მდინარაძემ.

NDI-ს კვლევის მიხედვით, 27 ქართველ პოლიტიკოსს შორის ყველაზე მაღალი დადებითი შეფასების მაჩვენებლები აქვთ დავით ბაქრაძეს, კახა კალაძესა და შალვა ნათელაშვილს. კვლევაში ევროპული საქართველოს ლიდერსა და თბილისის მერს დადებითი შეფასების თანაბარი მაჩვენებელი — 34% აქვთ. თუმცა, კალაძეს უარყოფითად 1%-ით მეტი აფასებს, ვიდრე ბაქრაძეს.

ამავე კვლევის მიხედვით, მოსახლეობის 40% პარლამენტის საქმიანობას ცუდად აფასებს და 17% ძალიან ცუდად.

ეროვნულ დემოკრატიულმა ინსტიტუტმა (NDI) კვლევა 2019 წლის 19 ნოემბრიდან 13 დეკემბრის ჩათვლით ჩაატარა. საქართველოს მასშტაბით (ოკუპირებული ტერიტორიების გამოკლებით), 2 180 (გამოპასუხება 35) პირისპირ ინტერვიუს წარმომადგენლობითი შერჩევის საფუძველზე გამოიკითხა. საშუალო ცდომილების ზღვარი 1,9 პროცენტია.

NDI-ის კვლევები ხორციელდება დიდი ბრიტანეთის მთავრობის UK aid-ის ფინანსური ხელშეწყობით. გამოკითხვას ატარებს CRRC — საქართველო.