ვახტანგ რობაქიძეს, რომელიც ანრი ოხანაშვილთან შელაპარაკების გამო დააკევეს, ახალციხის სასამართლომ ადმინისტრაციული სამართალდარღვევისთვის სამდღიანი პატიმრობა მიუსაჯა. სასამართლოს ინფორმაციით, ინციდენტის ადგილიდან განრიდების დროს რობაქიძე პოლიციელებს არ ემორჩილებოდა.

რობაქიძე კი აცხადებს, რომ ანრი ოხანაშვილის პირადი პატიმარია.

"ანრი ოხანაშვილს მივმართე, რომ ის არის ქვეყნის გამყიდველი მოღალატე. ამის გამო დარეკა პოლიციაში. არ ვიცი რატომ დარეკა. უბრალოდ, ვერ აიტანა ის, რომ ვუთხარი ქვეყნის მოღალატე ხარ-თქო. რაც რეალურია ის ვუთხარი, მეტი არაფერი არ მითქვამს", — განაცხადა ვახტანგ რობაქიძემ.

ვახტანგ რობაქიძესა და ანრი ოხანაშვილს შორის ინციდენტი 14 იანვარს ბაკურიანში მოხდა. შინაგან საქმეთა სამინისტროს ინფორმაციით, რობაქიძემ ქართული ოცნების დეპუტატს სიტყვიერი შეურაცხყოფა მიაყენა და დაემუქრა.