ტოკიო თანამედროვეობისა და ტრადიციულობის ნაზავია. აქ ყველაფერს ნახავთ, დაწყებული კედელში ჩატანებული ვიწრო კიოსკებით, სადაც ეროვნულ კერძს — გიოზას ყიდიან, დამთავრებული მაღალი კლასის სუშის ბარებით.

ამ ქალაქს შეუძლია ყოველ ნაბიჯზე, დღის ნებისმიერ მონაკვეთში აღფრთოვანებული დაგტოვოთ. მოსაწყენად კი დრო ნამდვილად არ დაგრჩებათ, თუ დილით ცუჯიკის თევზის ბაზრობაზე თინუსის აუქციონს დაესწრებით, შუადღეზე იმპერატორის სასახლის მიმდებარედ გაისეირნებთ, საღამოს კი კარაოკეზე ადგილობრივებთან ერთად იმღერებთ.

თუმცა, სანამ ბარგს ჩაალაგებდეთ და გეგმებს დააწყობდეთ, გაითვალისწინეთ ჩვენი რჩევები, რომლითაც ტოკიოში მოგზაურობა გაცილებით მარტივი და სასიამოვნო გახდება.

1. მოგზაურობის წინ ლარი გადაცვალეთ იაპონურ იენზე

იაპონიის სხვადასხვა რესტორნებში, სასტუმროებში ან მაღაზიებში ბარათით გადახდა, როგორც წესი, პრობლემას არ წარმოადგენს, მაგრამ სრულიად შესაძლებელია, რომ ქალაქის ნაკლებად ცნობილ ადგილებში ნაღდი ფული მოგთხოვონ. ამიტომ, სჯობს ლარი ადგილობრივ იენზე გადაცვალოთ და ფინანსურ გამოწვევებს მზად დახვდეთ.

2. აიღეთ მეტროს Pasmo ბარათი

იაპონიაში მეტრო წესრიგით და სისუფთავით გამოირჩევა. ამასთანავე, ის სწრაფი და იაფია, ამიტომ ტოკიოს შიგნით გადასაადგილებლად, ტაქსით მგზავრობის ნაცვლად, სჯობს მეტროს მიაშუროთ. მეტროს Pasmo ბარათის ღირებულება, დაახლოებით, 5 დოლარია. ბალანსის შევსება ნებისმიერ დროს შეიძლება, მატარებლის ლოდინი კი მხოლოდ რამდენიმე წუთით მოგიწევთ.

3. ქალაქებს შორის გადასაადგილებლად Japan Rail Pass გამოიყენეთ

ტოკიოდან კიოტოში მგზავრობის ბილეთი დაახლოებით $240 ღირს, მაგრამ შვიდდღიანი JR პასი, რომელიც, ქვეყნის მასშტაბით, მატარებლებზე შეუზღუდავი წვდომის შესაძლებლობას გაძლევთ, — 30 დოლარი დაგიჯდებათ. JR Pass გამოადგება ყველას, ვისაც ქვეყნის უკეთესად შესწავლა უნდა. მისი შეძენა მოგზაურობის წინ, ინტერნეტით ან ლიცენზირებული სამოგზაურო აგენტის მეშვეობით შეგიძლიათ.

4. თარგმანში დაკარგული

როგორი გამოცდილი მოგზაურიც არ უნდა იყოთ, იაპონიის პირველ ტურში თქვენ მაინც გადააწყდებით დაბრკოლებებს. მაშინ, როცა ბევრ ქვეყანაში საკომუნიკაციოდ ინგლისური შეგიძლიათ გამოიყენოთ, იაპონიაში ეს ნაკლებად ჭრის. მოგზაურობის დასაწყისში, შესაძლოა, ამ ფაქტმა თქვენში უსიამოვნება გამოიწვიოს, მაგრამ მისი დასრულებისას აუცილებლად დაგრჩებათ კმაყოფილების განცდა, რომელსაც სრულიად უცხო გარემოში, სახლიდან შორს ყოფნა გაგიჩენთ.

5. ატარე ზურგჩანთა ნარჩენების შესანახად

ტოკიოს ქუჩებში ნაგვის ურნებსა და ნაგავსაყრელებს იშვიათად შეხვდებით. არა იმიტომ, რომ იაპონელები გარემოს არ უფრთხილდებიან, პირიქით, ისინი მაქსიმალურად ცდილობენ ნაგავი გადაამუშავონ. სწორედ ამიტომ, სჯობს თან იქონიოთ რაიმე, რაშიც ნარჩენებს მოათავსებთ.

6. მეტი, ვიდრე სუში

სჯობს დღესვე დაივიწყოთ მითი იმის შესახებ, რომ თუ ზღვის პროდუქტები არ გიყვართ, იაპონიას არ უნდა ესტუმროთ.

იაპონური კულინარია ძალიან მდიდარი და მრავალფეროვანია. ადგილობრივებს განსაკუთრებით უყვართ როგორც კერძების გასინჯვა, ისე მომზადება. ასე რომ, დიდი დანაშაული იქნება თქვენი მხრიდან, თუ იაპონურ სამზარეულოს თევზეულის სიძულვილის გამო არ გაეკარებით.

გაითვალისწინეთ, რომ ერთი მოგზაურობით იაპონური სამზარეულოს ბოლომდე გაცნობას ვერ მოასწრებთ, რადგან აქ იმაზე მეტი კერძის გასინჯვა შეგიძლიათ, ვიდრე უბრალოდ სუშია.

7. გემრიელად ჭამისთვის ბევრი ფული არ დაგჭირდებათ

ტოკიოში ბევრი ძვირადღირებული რამ შეგხვდებათ, — მაგალითად, ვაგუის ძროხის ხორცი და კაიზეკის სამზარეულო. თუმცა, ასევე, არსებობს გემრიელი და იაფი ქუჩის საკვებიც, როგორიცაა ონგირი, გიოზა, ტამაგოიაკი და ქონდრის ბლინები. ტოკიოს ქუჩებში გემრიელი კერძების შესაძენად, დაახლოებით 10 დოლარი დაგჭირდებათ. რაც მთავარია, აქ თქვენთვის ნაცნობ და საყვარელ საკვებსაც შეხვდებით.

8. აღმოაჩინეთ ქალაქის ორი მხარე

სხვადასხვა ღირსშესანიშნაობასთან ერთად, ტოკიო ცათამბჯენებითაა ცნობილი. თუმცა, ამ ქალაქს მეორე მხარეც აქვს,— მშვიდი, აუჩქარებელი უბნებით. ნაკამეგურო, შიმოკიტაზავა, დაიკანიამა, უენო, იანაკა და კიჩიჯოჯი, იაპონური სტილის დაბალი სახლებით, მშვიდი ტაძრებთა და აყვავებული ბაღებით გამოირჩევა. ზოგიერთ ასეთ უბანში კი, შესაძლოა თქვენ ერთადერთი ტურისტიც კი იყოთ.

9. თავიდანვე ახსენე კვებითი შეზღუდვები

როგორც უკვე ვთქვით, იაპონელები დიდ მნიშვნელობას ანიჭებენ კულინარიას და კიდევ უფრო აფასებენ იმ ადამიანებს, ვინც მათთვის კერძებს ამზადებს. იაპონიაში ცუდ ტონად ითვლება, თუ კერძს ბოლომდე არ მიირთმევთ. სწორედ ამიტომ, ნუ მოგერიდებათ და შეკვეთის წინ თამამად გაუსვით ხაზი თქვენს კვებით შეზღუდვებს თუ უპირატესობებს. თუ უბრალოდ არ გსურთ კერძის გასინჯვა, არც ამ შემთხვევაში მოგერიდოთ, — უთხარით შეფს: "No shirako for me" (შირაკო არ მინდა).

10. მოემზადეთ, რესტორნების არჩევა ტოკიოში მარტივი საქმე სულაც არაა

როგორც კი პირველ გასეირნებას მოიწყობთ ტოკიოში, მალევე გააცნობიერებთ, რომ აქ უამრავი კაფე და რესტორანია. არჩევანი იმდენად დიდია, რომ რეკომენდაციები არ გამოგადგებათ და უფრო დაიბნევით. ტოკიოში ყველანაირ კვების ობიექტს შეხვდებით, ყველაზე უცნაურ ადგილზეც კი. ამიტომ, გირჩევთ, თქვენს ინსტინქტებს მიენდოთ. დაე იყოს ყველაფერი ისე, როგორც ნამდვილ მოგზაურობას შეეფერება!

11. გაითვალისწინეთ საზოგადოებრივ ტრანსპორტში მოქცევის წესები

იაპონიაში ტრანსპორტით სარგებლობისას განსაკუთრებული ყურადღება უნდა გამოიჩინოთ. აქ მატარებლებისა და ესკალატორების გასასვლელში გარკვეული წესები არსებობს და ხალხი ერთმანეთს გზას არ უჭრის. გარდა ამისა, მეტროში ჭამა და დალევა აკრძალულია. საინტერესოა ისიც, რომ ჩქაროსნულ მატარებლებში განსაზვრულია ვაგონები მხოლოდ წინასწარ დაჯავშნილი ადგილებისთვის.

ესკალატორის ეტიკეტი იაპონიაში აშშ-ის საპირისპიროა — იაპონელები დგანან მარცხენა მხარეს და ხალხს გვერდის ავლა მარჯვენა მხრიდან შეუძლია. საზოგადოებრივი ტრანსპორტით გადაადგილება კარგი იდეაა, თუ ადგილობრივი კულტურული მახასიათებლების ახლოს გაცნობა გსურთ.

12. იაპონიიდან დაბრუნებამდე, ახალი ტური დაგეგმეთ

ტოკიო იმ ადგილებს შორისაა, რომელსაც ვერასდროს ამოწურავთ. როგორც არ უნდა მოინდომოთ, ერთ მოგზაურობაში ტოკიოს სრულყოფილად ვერ გაიცნობთ. ერთი წასვლით, შესაძლოა, ვერ მოახერხოთ ყველა უბნის შესწავლა, სუვენირის მაღაზიების მონახულება, ყველა კერძის გასინჯვა, ან ხელოვნების და კულტურის ნიმუშებით ტკბობა, თუმცა, ყოველი ტურის შემდეგ, უფრო მეტის ნახვის სურვილი აუცილებლად შეგიპყრობთ. სწორედ ამიტომ, როგორც კი ტოკიოდან უკან წამოსასვლელი თვითმფრინავის ბორტზე ახვალთ, უკვე დაიწყეთ შემდეგი მოგზაურობის საფუძვლიანი დაგეგმვა.

დაიღალეთ იმის გამოცნობით, თუ როდისაა ბილეთები ყველაზე ხელმისაწვდომი? იაფი ავიაბილეთების მარტივად აღმოსაჩენად, შეგიძლიათ ავიაბილეთების კალენდარი გამოიყენოთ. კალენდარი ყველა ხელმისაწვდომ ვარიანტს გიჩვენებთ შერჩეული პერიოდისთვის და რაც უფრო მეტ თვეს აირჩევთ, მით უფრო მეტი შანსია, ბილეთებს შესაშურად იაფად გამოჰკრათ ხელი.