ამერიკის პრეზიდენტმა, დონალდ ტრამპმა პრესკონფერენციაზე საუბრისას თქვა, რომ როგორც ჩანს, ირანი შეჩერდა, რაც მთელი მსოფლიოსთვის კარგი ამბავია. ამერიკულ სამხედრო ბაზებზე ირანის თავდასხმის შემდეგ ეს პირველი პრესკონფერენცია იყო, სადაც ტრამპმა ისაუბრა.

"სანამ პრეზიდენტი ვარ, არ დავუშვებ ირანი ბირთვული შეიარაღების მქონე სახელმწიფო იყოს. მოხარული ვარ, გაცნობოთ, რომ ამერიკელი ხალხი უნდა იყოს ძალიან მადლიერი და ბედნიერი, არც ერთი ამერიკელი არ დაშავებული გუშინ ირანის შეტევის შედეგად. ყველა ჩვენი ჯარისკაცი უსაფრთხოდ არის და ძალიან მინიმალური ზიანი მიიღო ჩვენმა სამხედრო ბაზამ. ამერიკის ძლიერი ძალები მზად არიან ყველაფრისთვის. ჩანს, რომ ირანი შეჩერდება, რაც კარგი ამბავია ყველა ჩართული მხარისთვის და ძალიან კარგი ამბავია მსოფლიოსთვის", — თქვა დონალდ ტრამპმა.

პრესკონფერენციაზე მან ასევე აღნიშნა, რომ ყველამ ერთად უნდა იმუშაოს პრობლემების მოსაგვარებლად და ირანთან შეთანხმების მისაღწევად. მისი თქმით, ირანმა უნდა დაასრულოს ტერორიზმის მხარდაჭერა და უარი თქვას ბირთვული იარაღის წარმოებაზე. ამერიკამ დღეს ირანის მიმართ ახალი მკაცრი სანქციებიც დააანონსა.

8 იანვარს, დილით ირანმა ერაყში არსებულ ორ ამერიკულ ბაზას ბალისტიკური რაკეტებით შეუტია. აშშ-ის ცნობით, ამერიკული სამხედრო ბაზების მიმართულებით სულ მცირე 12 რაკეტა ისროლეს. თავდასხმა გასულ კვირას ირანელი გენერლის, სოლეიმანის ლიკვიდაციას უკავშირდება.

განხორციელებულ თავდასხმაზე პასუხისმგებლობა ირანის რევოლუციის გუშაგთა კორპუსმა აიღო. მათ განცხადებაში ნათქვამია, რომ ნებისმიერი ქვეყანა, სადაც აშშ-ის სამხედრო ბაზებია განლაგებული, შეიძლება აგრესიის სამიზნე გახდეს. გარდა ამისა, გუშაგთა კორპუსმა ამერიკის მოქალაქეებს მოუწოდა, მთავრობას რეგიონიდან სამხედრო ძალების გაყვანა მოსთხოვონ. ირანული სახელისუფლებო მედიის თქმით, ოპერაციას "მოწამე სოლეიმანი" უწოდეს.

ტრამპმა პირველ კომენტარი აღნიშნა, რომ ჯერ-ჯერობით ყველაფერი რიგზეია. აშშ-ს სამხედრო ძალების წარმომადგენელმა CNN-ს განუცხადა, რომ ერაყის ბაზაზე მყოფ სამხედრო პირებს საკმარისი დრო ჰქონდათ იმისთვის, რომ ირანის სარაკეტო შეტევებს გარიდებოდნენ. მისი თქმით, ჯარისკაცებმა ბუნკერებისთვის თავის შეფარება დროულად შეძლეს.

აინ ალ-ასადის საჰაერო ბაზა ერაყში 2003 წელს, სადამ ჰუსეინის ლიკვიდაციის შემდეგ განლაგდა, შემდეგ კი ერაყში და სირიაში სამხედრო ოპერაციების დროს იყო გამოყენებული. ამ ბაზაზე აშშ-სა და მისი მოკავშირეების 1 500 ჯარისკაცი იმყოფება.

აშშ-ის ავიაციის ფედერალურმა ადმინისტრაციამ ერაყის, ირანის, სპარსეთის ყურისა და ომანის ყურის თავზე სამოქალაქო ფრენები შეზღუდა.

გაიგეთ მეტი: