სულ ცოტა ხნის წინ ამერიკის პრეზიდენტმა, დონალდ ტრამპმა, ერაყში ირანის მიერ ამერიკის სამხედრო ბაზებზე თავდასხმის შესახებ ოფიციალური განცხადება გააკეთა, რომლის სრული ტექსტიც შეგიძლიათ აქ წაიკითხოთ. პრეზიდენტი 10 წუთის განმავლობაში საუბრობდა და ამ ხნის განმავლობაში რამდენიმე საკითხი განსაკუთრებით გამოყო.

ესეც 5 მთავარი აქცენტი ტრამპის სიტყვიდან:

1. შეტაკების შედეგად არც ერთი ამერიკელი დაშავებულა

ტრამპმა საუბრისას არაერთხელ გაუსვა ხაზი ფაქტს, რომ ირანის მიერ აშშ-ის ბაზების დაბომბვას ამერიკაში მსხვერპლი არ მოჰყოლია. აქამდე გავრცელებული ინფორმაციით, მსხვერპლის რაოდენობა უცნობი იყო.

2. ტრამპის განცხადებით, ირანი უკან იხევს

ამერიკის პრეზიდენტის თქმით, "ეს სასიხარულო ფაქტია როგორც თითოეული მონაწილე მხარისათვის, ასევე მსოფლიოსთვის".

3. ირანი ახალ სანქციებს უნდა ელოდეს

პრეზიდენტმა ირანის მიმართ ახალი სანქციები დააანონსა: "ამერიკის შეერთებული შტატები დაუყოვნებლივ გაატარებს დამატებით სადამსჯელო ღონისძიებებს ირანულ რეჟიმის მიმართ და ეს ეკონომიკური სანქციების სახით მოხდება".

4. თხოვნა მოკავშირე ქვეყნებს

ტრამპი მოკავშირე ქვეყნებს სთხოვს, ირანს მოუწოდონ, რომ ბირთვულ გეგმებზე უარი თქვას. "ირანმა უარი უნდა თქვას ბირთვული იარაღის გამოყენების სურვილზე და დაუყოვნებლივ უნდა შეწყვიტოს ტერორიზმის გაღვივება. ამასთან, ყველამ ერთობლივად უნდა ვიმუშავოთ ირანთან მოლაპარაკებაზე მსოფლიო მშვიდობისა და უსაფრთხოებისთვის".

5. ტრამპის თქმით, ყასემ სოლეიმანი მსოფლიოს მთავარი ტერორისტი იყო

დონალდ ტრამპმა სიტყვის დასრულებისას მოკლული ირანელი გენერალი გააკრიტიკა. მისი განცხადებით, ყასემ სოლეიმანი მსოფლიოს მთავარი ტერორისტი იყო, რომელიც ამერიკაზე ახალ შეტაკებებს გეგმავდა. ტრამპის თქმით, გენერალი სწორედ ამ ყველაფრის პრევენციისთვის მოკლეს.

გაიგეთ მეტი: