პარლამენტის წევრი, დავით ლორთქიფანიძე გაზეთ ახალ თაობასთან საუბარში ამბობს, რომ მერვე მოწვევის პარლამენტის მუშაობის პროცესში ენმ საკონსტიტუციო ცვლილებების განხორციელებას ხმას გარკვეულ საკითხებზე ვაჭრობით აძლევდა. ლორთქიფანიძის თქმით, მათ შორის არის ვანო მერაბიშვილისა და გიგი უგულავას გათავისუფლების საკითხიც:

"საკონსტიტუციო ცვლილების განსახორციელებლად საჭიროა 113 დეპუტატის ხმა. ამდენად, თუ არ გაქვს საკონსტიტუციო უმრავლესობა, დამატებით 13 დეპუტატთან გიწევს წინადადების გაზიარება. ენმ მაქსიმალურად ცდილობდა საჭირო ყოფილიყო. გამალებული ვაჭრობა ჰქონდათ, რაღაც საკითხში დაგთანხმდებით, თუ მერაბიშვილს ან უგულავას გათავისუფლებთო".

ლორთქიფანიძე ამბობს, რომ მიუხედავად ზემოაღნიშნულისა, მმართველ ძალას ენმ-ს წინადადებები არ გაუზიარებია.

ახალი თაობის ჟურნალისტი ლორთქიფანიძესთან საუბარში ასევე ხაზს უსვამს იმას, რომ ამ ეტაპზე რიგი პოლიტიკოსებს ქართული ოცნების საკონსტიტუციო უმრავლესობით პარლამენტში შესვლა საშიშროებად ევლინებათ, რაზეც ლორთქიფანიძე პასუხობს, რომ ეს თითიდან გამოწოვილი თემაა:

"ენმ-ს ჰგონია, როგორც თვითონ იქცეოდა, ისე მოიქცევა ქართული ოცნებაც, როცა საკონსტიტუციო უმრავლესობა ექნება".

ჟურნალისტის შეკითხვას, რამდენად მოქმედებს ბიძინა ივანიშვილის ფაქტორი, რომ ქართულმა ოცნებამ ცუდი გადაწყვეტილებები არ მიიღოს ლორთქიფანიძემ უპასუხა:

"არ მომერიდება და ვიტყვი, რომ ბიძინა ივანიშვილის ფაქტორი არის მნიშვნელოვანი და გადამწყვეტი. ბიძინა ივანიშვილი და ჩვენ მოვედით, რომ ნაცრეჟიმი დაგვემარცხებინა. თუ ვინმეს ჰგონია, რომ ივანიშვილს არავინ უნდა ელაპარაკოს, ცდება".