მას შემდეგ, რაც პარლამენტის წინ კარვები აშალეს, პოლიციასა და აქტივისტებს შორის დაპირისპირება მოხდა. სამართალდამცავებმა ძალის გამოყენებით გაიყვანეს #სირცხვილიას რამდენიმე წევრი.

აქტივისტების ინფორმაციით, დაკავებული არიან ზუკა ბერძენიშვილი ბექა კოკაია, ნოდარ რუხაძე, ბექა ბასილია, ზურა მჟავანაძე და გიორგი მუმლაძე. On.ge შინაგან საქმეთა სამინისტროში ცდილობს გაარკვიოს, ზუსტად რამდენი ადამიანია დაკავებული და რა მიზეზით.

პარლამენტის წინ კარვების აყრისა და ტერიტორიის გაწმენდის შემდეგ საბავშვო ატრაქციონებს ამონტაჟებენ. ტერიტორია 31 დეკემბერს, დაახლოებით, ღამის პირველის ნახევარზე გაწმინდეს. კარვების გარდა, რუსთაველის გამზირზე იყო აქციებისთვის საჭირო ატრიბუტიკა — დროშები, "გახარიას ბიუსტი" და ბანერები.

თბილისის მერიამ კარვების აყრა საახალწლოდ, 2018 წელსაც სცადა. მაშინ რუსთაველის გამზირზე აქციებს ზაზა სარალიძე და მალხაზ მაჩალიკაშვილი ატარებდნენ. სამოქალაქო აქტივისტების, ოპოზიციისა და არასამთავრობო ორგანიზაციების წინააღმდეგობის შემდეგ თბილისის მერიამ კარვების აყრა ვერ შეძლო, რუსთველზე კი უფრო მეტი კარავი გაიშალა. მერიას მოუწია საახალწლო ღონისძიებები პირველი რესპუბლიკის მოედანზე გადაეტანა.