რუსეთის პრეზიდენტი, ვლადიმერ პუტინი და პრემიერ-მინისტრი, დიმიტრი მედვედევი ოკუპირებულ ცხინვალთან ორმხრივი ურთიერთობების გაძლიერების პირობას დებენ. ამის შესახებ მათ საკუთარ წერილებში ისაუბრეს, რომლითაც ოკუპირებული ცხინვალის დე ფაქტო პრეზიდენტ ანატოლი ბიბილოვს ახალი წელი მიულოცეს.

ოსური სახელისუფლებო გამოცემა რესის-ის ინფორმაციით, პუტინი საკუთარ წერილში აღნიშნავს, რომ ორ სახელმწიფოს შორის ურთიერთობები ინტეგრაციისა და თანამშრომლობის პრინციპების საფუძველზე ვითარდება.

"ბოლო პერიოდში მოვახერხეთ ბევრი პროექტის რეალიზება, რომელიც ხელს უწყობს სამხრეთ ოსეთის სოციალურ-ეკონომიკურ განვითარებას და სახელმწიფოებრიობის განმტკიცებას. ვიმედოვნებ, რომ მომავალ წელს სხვადასხვა სფეროში ორმხრივი თანამშრომლობის გასავითარებლად ჩვენ გავაგრძელებთ ერთობლივ მუშაობას", — წერს პუტინი.

პრემიერ-მინისტრი დიმიტრი მედვედევიც მისალოც წერილში სხვადასხვა პროექტის განხორციელებაზე ამახვილებს ყურადღებას:

"[2019 წელს] რუსეთი აგრძელებდა რესპუბლიკის სახელმწიფო ინსტიტუტების გაძლიერების, ეკონომიკისა და სოციალური სფეროს განვითარების ხელშეწყობას".

მანაც იმედი გამოთქვა, რომ 2020 წელსაც ორმხრივი თანამშრომლობა უფრო მეტად გაღრმავდება.