პოლიტიკური გაერთიანება ლელო საქართველოსთვის ერთ-ერთი ლიდერის, გრიგოლ გეგელიას აზრით, თავისუფალ ბაზარი და ბიზნესის სოციალური პასუხისმგებლობა თავსებადია. ასე გამოეხმაურა ლელო საქართველოსთვის მემარცხენე წევრი, გრიგოლ გეგელია პარტიის ლიდერის განცხადებას, სადაც მამუკა ხაზარაძემ სახელმწიფოს ჩარევისგან თავისუფალ ბაზარზე ისაუბრა.

"სოციალური პასუხისმგებლობა არ არის ექსკლუზიურად ერთი იდეოლოგიის მახასიათებელი, ეს ჩემთვის პირველ რიგში არის პოლიტიკური პასუხისმგებლობის მახასიათებელი... ჩვენ არ გვგონია თავისუფლების შეზღუდვა ის, რომ ელემენტარულად ბადეებით იყოს დაცული მშენებლობა და ის, რომ არ შეიძლება ადამიანი ჩაკეტო მაღაროში. უნდა გვქონდეს ქმედითი მექანიზმები, რომ შრომა იყოს ღირსეული და დაცული ეს ყველაფერი არის ნორმალური, ღირსეული სახელმწიფოს და ადეკვატური ბაზრის მახასიათებლები. არანაირი განსაკუთრებული და რევოლუციური არაფერი არაა იმაში, რომ ეს ორი რამ თავსებადია", — თქვა On.ge-სთან საუბრისას გრიგოლ გეგელიამ.

მისი თქმით, ლელო ცენტრისტული პარტიაა და აპირებს შექმნას მოდელი, რომელიც ეკონომიკის განვითარებასაც შეუწყობს ხელს და საყოველთაო საჯარო სიკეთეებსაც დაუჭერს მხარს. გრიგოლ გეგელიას აზრით, ყველა იდეოლოგიაზე მთავარი, რაღაც თვალსაზრისით არის ის, თუ როგორ დავძლიოთ დღეს არსებული კრიზისი.