ფრაზა - And the Oscar goes to… წელს 89-ედ გახდება ჰოლივუდის ვარსკვლავების გულისცემის გახშირების მიზეზი. არც თუ უსაფუძვლოდ, ოსკარი ხომ მსოფლიოში ყველაზე დიდი კინო მოვლენაა, ოქროს ქანდაკების ხელში დაჭერა კი კინოსამყაროს ყველაზე დიდ მაგიად ითვლება.

თუმცა, როგორც აღმოჩნდა ეს ყველასათვის ასე არ არის, ოსკაროსანი მსახიობი ენ ჰეთეუეი, რომელმაც ეს ჯილდო 2013 წელს ფილმ "საბრალონში" შესრულებული როლისთვის მიიღო, Hollywood Reporter‎-ს გაუმხილა, რომ მისი ღიმილის მიღმა ძალიან დიდი დაბნეულობა და შიში იმალებოდა.

"ოსკარის სამადლობელ სიტყვაში ვთქვი, ჩემი ოცნება ახდა-მეთქი, მაგრამ რეალურად ასე არ ყოფილა. ამ ფილმის შექმნის დროს შეიძლება ითქვას, რომ ჭკუიდან გადავედი და ახლაც ვერ მოვდივარ აზრზე. ხანდახან მგონია, რომ სერიოზული ფსიქოლოგიური პრობლემები მაქვს. ოსკარის ასაღებად სცენაზე ასვლა კი ჩემს ცხოვრებაში ერთ-ერთი ყველაზე არაკომფორტული მოვლენა იყო. ძალიან რთულია ბედნიერება ითამაშო მაშინ, როცა ბედნიერი არ ხარ. პირიქით, დაბნეული, შეშინებული და კომფორტის ზონიდან გამოსული ვიყავი. ძალიან შემაწუხებელი იყო ისიც, რომ კაბა, რომელიც მე ოსკარის ღამეს მეცვა, შესაძლოა ღირდა იმაზე ძვირი, ვიდრე რომელიმე ადამიანის მთელი ცხოვრების საარსებო მინიმუმი. ამის გაცნობიერება ძალიან მტკივნეულია" - თქვა ენ ჰეთეუეიმ.