იუსტიციის მინისტრი თეა წულუკიანი მედიას ურჩევს, რომ დრო არა სახელისუფლებო ტროლებისა და ბოტების, არამედ "ბოკერიასა და მისი ბელადის ტყუილების" გაშუქებას დაუთმოს.

"დღეს პარლამენტის თავმჯდომარე ბრძანებდა, რომ მთავარი ტროლები ქუჩაში არიან და თქვენ, საზოგაოდებას ცდილობენ ბოკერიები და სხვები, მათი ბელადი, რომელიც საზღვარგარეთ არის, მოგყიდონ ტყუილი. ჯობია ეს გააშუქოთ და ამაზე ისაუბროთ", — განუცხადა მან ჟურნალისტებს.

ამ განცხადებით წულუკიანი იმეორებს მმართველი გუნდის მესიჯბოქს, რომლითაც ისინი Facebook-ის მიერ სახელისუფლებო პროპაგანდისტული გვერდებისა და ყალბი ანგარიშების წაშლას პასუხობენ. ოცნების ყველა წევრი ერთხმად ამტკიცებს, რომ მათ ამ გვერდებთან კავშირი არ აქვთ და "ფეიკნიუსერი" სინამდვილეში მათი ოპონენტია.

20 დეკემბერს ფეისბუქმა ასეულობით გვერდი და ანგარიში დაბლოკა, რომელიც მათი განცხადებით, მმართველ გუნდთან იყვნენ კავშირში და დეზინფორმაციას ავრცელებდნენ. მათი თქმით, ამ გვერდებისა და ანგარიშების რეკლამირებაში თითქმის $316 ათასი დაიხარჯა.

ფეისბუქის განცხადებაში ნათქვამია, რომ ამჟამად უკვე წაშლილი გვერდები მმართველ ძალასთან, ქართულ ოცნებასთან იყვნენ დაკავშირებულები, თუმცა თავს პარტიებად, მედიებად, რეალურ პირებად და აქტივისტთა ჯგუფებად აჩვენებდნენ.

"მიუხედავად იმისა, რომ ანგარიშების უკან მდგომი ადამიანები ცდილობდნენ, შეენიღბათ კოორდინირებული მუშაობა, კვალს სარეკლამო კომპანია პანდასთან და ქართული ოცნების ხელისუფლებასთან მივყავართ", — ნათქვამია განცხადებაში.

როგორც ატლანტიკური საბჭოს ციფრული გამოძიების კვლევის ლაბორატორია აცხადებს, გვერდები უმეტესად ქართულ აუდიტორიაზე მუშაობდნენ და ავრცელებდნენ ისეთ სოციო-პოლიტიკურ კონტენტს, რომელიც საზოგადოების პოლარიზაციას უწყობდა ხელს, თავს ესხმოდა ოპოზიციურ პარტიებსა და სამოქალაქო საზოგადოებას და საქართველოს დასავლელი პარტნიორების, კონკრეტულად კი ამერიკის შეერთებული შტატების დისკრედიტაციას ეწეოდა.