საქართველოს საგარეო საქმეთა მინისტრი დავით ზალკალიანი უარყოფს, რომ ქართული ოცნებას Facebook-ის მიერ წაშლილ პროპაგანდისტულ გვერდებთან რაიმე კავშირი ჰქონდა და პასუხად კომპანიის "რეპუტაციულ პრობლემებზე" საუბრობს.

"არამც და არამც არ ვადასტურებ, კატეგორიულად მიუღებელია ეს ჩემთვის, რადგანაც ვიცი რა არის ხელისუფლების ნაწილი და დარწმუნებული ვარ, რომ ის საიტები, რომლითაც ხელისუფლება ახდენს კომუნიკაციას საზოგადოებასთან არის მხოლოდ და მხოლოდ ოფიციალური", — განაცხადა მან იმედის ეთერში.

ამ დროს წამყვანმა აღნიშნა, რომ ფეისბუქი სერიოზული ორგანიზციაა და რეპუტაციულად არ იქნება მისთვის კარგი, რომ ყალბი ინფორმაცია გაავრცელოს, რაზეც მინისტრმა განაცხადა:

"რეპუტაციული პრობლემები ფეისბუქისთვის არახალია. ჩვენ გვახსოვს, რომ ცოტა ხნის წინ თავად ფეისბუქს მოუწია გამოსვლა აშშ-ის კონგრესში და კონგრესმენების წინაშე ბევრი კითხვისთვის პასუხის გაცემა. აქედან გამომდინარე, ეს არის იმ პოლიტიკის გაგრძელება, რომელიც დაკავშირებულია პრობლემებთან ფეისბუქის შიგნით და სწორედ აქედან გამომდინარე ეს მათი მცდელობა ემსახურება არაავთენტური ანგარიშების გაუქმებას".

მინისტრი, ფრაქცია ქართული ოცნების თავმჯდომარის, მამუკა მდინარაძის მსგავსად ხაზს უსვამს იმ ფაქტს, რომ ნაციონალური მოძრაობის მხარდამჭერების და ქართული ოცნების მაკრიტიკებლების ანგარიშები არ გაუქმებულა. ის იხსენებს, სხვადასხვა სახის დეზინფორმაციას, რომელიც ქართული ოცნების წინააღმდეგ გავრცელდა.

20 დეკემბერს ფეისბუქმა ასეულობით გვერდი და ანგარიში დაბლოკა, რომელიც მათი განცხადებით, მმართველ გუნდთან იყვნენ კავშირში და დეზინფორმაციას ავრცელებდნენ. მათი თქმით, ამ გვერდებისა და ანგარიშების რეკლამირებაში თითქმის $316 ათასი დაიხარჯა.

ფეისბუქის განცხადებაში ნათქვამია, რომ ამჟამად უკვე წაშლილი გვერდები მმართველ ძალასთან, ქართულ ოცნებასთან იყვნენ დაკავშირებულები, თუმცა თავს პარტიებად, მედიებად, რეალურ პირებად და აქტივისტთა ჯგუფებად აჩვენებდნენ.

"მიუხედავად იმისა, რომ ანგარიშების უკან მდგომი ადამიანები ცდილობდნენ, შეენიღბათ კოორდინირებული მუშაობა, კვალს სარეკლამო კომპანია პანდასთან და ქართული ოცნების ხელისუფლებასთან მივყავართ", — ნათქვამია განცხადებაში.

როგორც ატლანტიკური საბჭოს ციფრული გამოძიების კვლევის ლაბორატორია აცხადებს, გვერდები უმეტესად ქართულ აუდიტორიაზე მუშაობდნენ და ავრცელებდნენ ისეთ სოციო-პოლიტიკურ კონტენტს, რომელიც საზოგადოების პოლარიზაციას უწყობდა ხელს, თავს ესხმოდა ოპოზიციურ პარტიებსა და სამოქალაქო საზოგადოებას და საქართველოს დასავლელი პარტნიორების, კონკრეტულად კი ამერიკის შეერთებული შტატების დისკრედიტაციას ეწეოდა.